Microsoft konpainiak jaso dau Izaera Eleanitza Sustatzeko I. Saria

| Ikusi handiago | Argazki originala

Eusko Jaurlaritzeak, Kataluniako Generalitateak, Galiziako Xuntak eta Balear Ugarteetako Gobernuak, hizkuntza-politikearen alorrean indarrean daben alkarlanaren barruan, Estadu espainiarreko izaera eleanitza sustatzera zuzendutako saria sortu dabe eta lehenengo edizinoan Microsoft konpainia da sariduna, 'teknologia barriak eta hizkuntzen aniztasuna buztartzeko egin dauen lanagaitik'. Sariaren helburua persona, enpresa edota erakunde batek Estaduko hizkuntza aniztasunaren alde egindako lana autortzea da.

Saria Euskadi, Katalunia, Galizia eta Balear Ugarteetako gobernuek 2007tik hizkuntza-politikearen arlorako indarrean daben alkarlanaren barruan sortu da. Lau gobernuek berbatu dabe hizkuntz normalizazinoa alkarregaz sustatzea eta hizkuntz politikarako arloetako alkarlana bultzatzea. Ganera, Estaduan gaztelaniagaz batera ofizialak diran hizkuntzen erabilerea eta autortza instituzionala sustatu gura dabe.

Alkarlan protokolo honen barruan eta UNESCOk bultzatuta igaz ospatu zan Hizkuntzen Nazinoarteko Urtearen harira eratu eben saria lau gobernuetako hizkuntza-politikarako goi arduradunek. Hizkuntz aniztasunaren aldeko sari hau ohorezko aitamena da eta ez dakar diru saririk. Lehenengo aldi honetan Microsoft enpreseari emon jako, 'teknologia barriak eta hizkuntzen aniztasuna buztartzeko egin dauen lanagaitik'.

Microsoft

Microsoft-ek, lau gobernuetako hizkuntz politikarako sailakaz alkarlanean, bere produkzinoak Estaduko hizkuntza ofizial guztietan kaleratu ditu, eta Windows Vista sistema eragilea eta Microsoft Office 2007 softwarea euskeraz, katalanez eta galegoz preparau ditu.

Alde horretatik, enpreseak bere software eskaintzea Estaduko hizkuntza ofizial guztietara moldatzeko egin dauen lana autortzen jako. Egun, Microsoft-ek gailegoz, katalanez eta euskeraz eskaintzen ditu Windows eta Officeko sistemak, baita Windows XP eta Office 2003 edota Windows Vista eta Office 2007.

Sariaren epaimahaiaren esanetan, 'Informazino eta Komunikazinorako Teknologia Barriei esker denpora eta geografiaren mugak pasau daitekez eta aukera bikaina eskaintzen jake munduko hizkuntzei euren lekua izateko mundu-auzoko galaxia birtualean. Horrexegaitik da hain inportantea Microsoft-ek emon dauen pausua. Egindakoagaitik emon jako saria'.

Sari-banaketa ekitaldia Madrilgo Circulo de Bellas Artes alkartean izan da. Ekitaldian izan dira Maria Garaña Microsoft Iberica-ko presidentea eta lau gobernuetako hizkuntza politikearen buruak: Patxi Baztarrika (Eusko Jaurlaritza), Bernat Joan (Kataluniako Generalitat), Marisol Lopez (Galiziako Xunta) eta Margalida Tous (Balear Ugarteetako Govern).