.eus, euskerea Interneten kokatzeko domeinua

| Ikusi handiago | Argazki originala

Euskereak eta erronka barriek bultzatuta, PuntuEus alkarte barria sortu da. Egia esateko, PuntuEus Alkartea 2008ko apirilaren 2an eratu zan, Euskerearen eta Euskal Kulturearen Komunidadearen barruko hainbat talde edota erakunde desbardin alkartuta. Euskalgintza arlotik, Euskaltzaindia, Euskerearen Gizarte Erakundeen Kontseilua, Euskal Konfederazinoa eta Euskal Idazleen Elkartea - Hegats; Hezkuntzearen arlotik, Euskal Herriko Ikastolen Konfederazinoa, Ikastolen Elkartea - Partaide, IEP eta Euskal Herriko Unibersidadea; eta Internet eta komunikazinoaren arlotik, EiTB, Internetika, Euskal Herriko Telekomunikazino Ingeniarien Elkartea eta Euskadiko Informatikako Ingeniarien Elkargo Ofiziala.

Sustatzaileen arabera, euskereak 'erronka guztiei' erantzun behar deutse eta alkarte barriak erronka horreetako bati ekingo deutso: 'euskerea eta euskal kulturea Interneteko espazioan ikusgarri bihurtzea'. Erronka horri .eus domeinuagaz ekingo deutse.

'Euskerearen eta euskal kulturearen Interneteko presentziari, izanari, izena jarri gura deutsagu', azaldu dabe elkarte barriko sustatzaileek Bilbon egindako aurkezpenean.

Informazinoaren eta Komunikazinoaren Teknologiak egungo gizarteko esparru guztietara zabaldu dira eta 'euskerearen erronka barrien ardatza' dira. Alkarteko arduradunen arabera, euskaldunek 'beharrezkoa' dabe teknologiak euskerara hurreratzea, 'euskerea teknologien bitartez munduratu behar dogu'.

Zentzu horretan, euskerea lako eremu urriko hizkuntzentzat, 'ateak zabalik dagoz Interneten', eta milaka euskaldunen parte-hartze aktibo eta konpromisoagaz, 'euskerearen presentzia erreala eta bizia da Interneten'. 'Euskereaz bizi gaitekez eta euskereaz bizi behar dogu sarean, euskereak biziten segiduteko', azpimarratu dabe.

Euskereak Interneteko espazio birtualean espazioa daukala azpimarratu dabe PuntuEus alkarteko sustatzaileek, baina 'izanari izena jarri gura deutsagu'. 'Existiduten dan euskerazko Internet horri, Interneteko Euskerearen eta Euskal Kulturearen Komunidadeari, ikur bat sortu gura deutsagu. Sinbolo bat. Izen bat. Interneteko sareen sarean, euskerea eta euskal kulturea identifiketako balioko dauen izen bat', azaldu dabe.

Azken batean, alkarteak euskereari 'nazinoarteko autortzea eskainiko deutson ikur bat' lortu gura dau: .eus domeinua.

Ibilbide luzea

Ekimenaren bultzatzaileek erronka horrek ibilbide luze bat eskatzen dauela gogoratu dabe. 'Ibilbide hori luzea izango dan arren, bidea ez da asmau behar, izan be, orain dala hiru urte inguru sortu zan hizkuntza eta kulturak Interneten ikusgai egoteko lehenengo domeinua: .cat, Hizkuntza eta Kultura Katalanaren Domeinua'.

Euskerearen eta euskal kulturearen Interneteko ikurra lortzeko ibilbidea Euskereak eta Euskal Kulturearen Komunidadeak egin behar dauela azpimarratu dabe, '.eus Euskerea eta Euskal Kulturearen Komunidadearen domeinua izango bada'.

Alkartearen eretxiz, 'aniztasuna' da komunidade horren ezaugarri nagusia, eta euskerea eta euskal kulturea dabe ardatz. 'Oraindino bide luzea geratzen jako. Ibilbide luzea da, beraz, hasi besterik egin ez doguna'.

Ibilbide luze horretako lehenengo pausua da PuntuEus alkartea sortzea, 'danontzako lekua izango dauena'.