Oraintsu hildako Mahmud Darwish, askok Palestinako poeta nazionaltzat joten dabena omenduko dabe Bilbon

| Ikusi handiago | Argazki originala

San Frantziskoko Udal Liburutegiak Mahmud Darwish poeta palestinar hil barriaren omenezko ekitaldia egingo dau martitzenean, urtarrilaren 20an. Bertan, Deustuko Unibersidadean irakasle laguntzaile dabilen Hithem Abdulhaleem psikologo palestinarrak eta Aït El Bouhali Bouchra errezitatzaile marokoarrak parte hartuko dabe, Darwish-en ‘Arrosa gitxiago’ liburuko poema batzuk gaztelaniaz eta arabieraz irakurteko asmoz. Errezitaldia 19:00etan hasiko da, eta sarrerea dobakoa da.

Mahmud Darwish (Galilea, 1941-Houston, 2008) arabierazko idazlerik garrantzitsuenetakotzat joten da, baita Palestinako poeta nazionaltzat be bere poesiaren konpromisoa gogoan hartuta. Bere lana Palestinako kontzientzia poetikotzat joten da. Darwish bertan jaio zan, eta Israelgo armadeak bertatik kanporatatu eban poetearen familia. Bere poemarik ezagunena, ‘Nortasuna’ izenburukoa, arabiar munduaren ereserki bilakatu zana, agintari israeldarrek palestinarrei sinarazoten eutsien inprimaki batean oinarrituta dago. Poetearen izena historiagaz lotuta azalduko da beti, Palestinaren Independentzia Deklarazinoa idatzi eban-eta 1988an.

Bere poemak Hurreko Ekialdeko egoera politikoaren salaketa argia dira (Palestina galdutako paradisua balitz bezela agiri da), eta arabiar tradizino poetikoa erabarritzen lagundu dabe, errealismo metafisikora hurreratuz. Bere ibilbide luzean, nazinoarteko sari ugari jaso eban, besteak beste, Frantziako Arte eta Letretako Zaldunaren domina edo Holandako Klaus Printzea Saria.

2001ean barrriro zabaldu zanetik, San Frantziskoko Udal Liburutegiak (Bilboko Udal Liburutegi Sarean sartuta dago) Bilboko auzo honetako aniztasun etniko eta kulturala islatzen dauen materiala batzera bideratu ditu bere funtsetako batzuk. Horri esker, bertako apalategietan hizkuntza desbardinetan idatzitako liburuak topa daitekez, baita hizkuntzak ikasteko metodoak eta inmigrazinoari buruzko bibliografia zabala be.