Bilboko Udalak eta Bilbao Dendak alkarteak merkataritzan euskerearen erabilerea sustatzeko kanpainea abiarazo dabe

| Ikusi handiago | Argazki originala

Bilboko Udaleko Euskara Sailak, Lan Ekintza udal sozietateagaz eta Bilbao Dendak alkarteagaz alkarlanean, 'Biribilko: el euskera amable. Orain bai. Horrela bai' izeneko kanpainea jarri dau martxan, Bilboko merkataritzan euskerearen normalizazinoa sustatzeko asmoz.

Euskerearen erabilerea normalizetako prozesua uriko merkataritzan bultzatzea helburu dauen 'Biribilko' proiektuaren barruan dago kanpainea, eskaintzaren eta eskariaren arteko merkataritza komunikazinoan euskerea presente egon daiten saiatuz. Siadeco enpresea arduratu da proiektuaren diseinuaz eta garapen teknikoaz.

Ekimenaren helburua 'Biribilko' Bilboko gizarteari aurkeztea da, eta zehatzago, uriko merkataritzako hartu-emonetan euskerea erabiltera konbidatzea, beti be begirunez, eta horregaz batera, merkataritza establezimenduetan lanean dabilzan personei zuzendutako euskera ikastaroen eskaintzea sustatzea.

Holan, bada, kanpainea uriko merkataritza eskaintzeari eta eskariari zuzenduta dago. Eskariari jagokonez, helburu nagusia 'Biribilko'-ren irudiaren inguruan eta 'Biribilko'-ren atzean dagozan faktoreen inguruan sentsibilizazinoa lantzera zuzendutako informazinoa eskaintzea da.

Eskaintzeari jagokonez, barriz, Bilboko Udala HABE erakundeagaz alkarlanean uriko merkataritza establezimenduei zuzenduta antolatzen ari dan euskera ikastaroen eskaintzari buruzko informazino zuzena emotea da helburu nagusia.

Bilboko merkataritza sektorearen egoera soziolinguistikoaren azterketea

Bilboko merkataritzearen sektorearen egoera soziolinguistikoaren azterketak euskereak merkataritza-harremanen berezko ezaugarriei erantzun behar deutsela erakusten dau, eta begirunea da, hain zuzen be, salerosketa ekintza gustura egin izanaren erakusgarri nagusietakoa.

Bilboko eta bere inguruneko errealidade soziolinguistikoaren bilakaereak erakusten dau euskaldunen kopurua gero eta handiagoa dala eta merkataritzeak egoera horretara moldatu beharra daukala. Bilbon eta bere inguruan gero eta euskal hiztun gehiago dago: Bilbon 165.000 pasatxo dira euskeraz dakiten edo ulertzen daben personak; 410.000, Bilboko metropoli-barrutia kontuan hartuta.

'Biribilko'-k batutako azken datuen arabera, merkataritzako bezero potentzialen % 60 inguruk uste dau komertzioan euskerea erabilteak merkataritzako zerbitzuaren irudia eta kalidadea hobetzen lagundu leikela. 'Biribilko'-k uriko bi merkataritza-gunetan (Erdigunean eta Santutxu inguruan) egindako ikerketa pilotuak gauza bera berresten dau.