Bilboko Udalak eta Euskaltzaindiak euskerea sustatzea helburu dauen lankidetza hitzarmena sinatu dabe

| Ikusi handiago | Argazki originala

Bilboko Udalak -Euskera Sailaren bitartez- eta Euskaltzaindiak uriburu bizkaitarrean euskerearen erabilerea sustatzeko lankidetza hitzarmena sinatu dabe. Erakunde biek hizkuntzea bultzatzeko interesa dabe eta sinadura honen bitartez bilbotarren artean euskerearen erabilera sustatu gura da, bai berbadunen kopuruari zein berbakerearen kalidadeari jagokonez.

Iñaki Azkuna Bilboko alkateak eta Andres Urrutia euskaltzainburuak sinatu daben hitzarmenak hainbat konpromiso jasoten ditu. Erakunde biek kulturrea sustatzeko ekintzak, ikastaroak, berbaldiak, erakusketak eta euskerearen aldeko bestelako ekimenak bultzatuko ditue.

Gainera, Bilboko Udaleko Euskera Sailak 25.000 euro jarriko ditu Euskaltzaindiak lan batzuk egiteko. Alde batetik, hizkuntz aholkularitzea eskainiko deutse udal zerbitzuei, herritarrei zerbitzu egokia emateko; aholkularitza hori, batez be, bideen izenen eta uriaren toponimoaren ganeko duda-mudak argitzera bideratuko da.

Euskaltzaindiak Bilboko Plaza Berriko 15ean dauen egoitzaren Zerbitzu Orokorren bidez herritarrek eskatzen deutsen informazinoa eta laguntzinoa eskaintzen jarraituko dau. Horrezaz ganera, euskereak Bilbon bizi izan dauen eta bizi dauen egoerea ezagutzeko azterlanen garapena egingo dau Euskaltzaindiak.

Amaitzeko, Bilborentzat esanguratsuak diran baina agortuta dagozan euskal lanen berrargitalpenak eta alkar lankidetza horretatik sortzen diran beste lanen argitalpenak egingo dira.

Bilboko Udalaren eta Euskaltzaindiaren arteko hitzarmena indarrean egongo da 2008ko abenduaren 31ra arte eta modu automatikoan luzatuko da beste urtebeterako.

Udal bilbotarreko iturriek azaldu dabenez, akordioa aurrerapauso garrantzitsua da Bilboko Udaleko Euskera Sailaren jarduera ardatz nagusientzat, 2006an onartutako Euskara Biziberritzeko Plan Nagusian batzen diranak. Bide horren helburuak euskerearen transmisinoa, erabilera eta kalidadea bermatzea dira.