Euskalerria Irratiak eta Euskaltzaindiak bion arteko lankidetza-hitzarmena sinatu dabe

Euskalerria Irratia eta Euskaltzaindiaren arteko lehenengo lankidetza-hitzarmena sinatuko dabe Iruiñean, Euskalerria Irratiaren egoitzan. Euskalerria Irratiaren izenean Jose Antonio Solano Iruñeako Komunikabideak S.A. enpresaren kontseiluburuak eta Mikel Bujanda zuzendariak sinatu dabe eta, Euskaltzaindiarenean, Andres Urrutia euskaltzainburuak egin dau.

Hitzarmen horrek, Euskaltzaindiaren eta Euskalerria Irratiaren arteko loturak sortzea dau helburu, alkarren autorpenetik abiatuz. Halan, bada, erakunde biak alkarlana garatuko dabe, batez be, euskerearen normalizazinoari buruzko proiektuak gauzatzeko.

Bi erakundeen arteko lankidetzearen abiapuntua da Euskalerria Irratiak autortzen dauela, hizkuntza gaietan, Euskaltzaindia dala erakunde aholku-emoile ofiziala eta euskereagazko arauemoile ofiziala. Era berean, Euskalerria Irratiak eta Euskaltzaindiak alkarri autortzen deutsiez euskerazko sustatze ahaleginetan euren nortasuna eta zeregina. Horregaitik, bi sinatzaileok lankidetza-proiektu zehatzak bideratu eta garatuko ditue, euskerearen eta euskal kulturearen inguruko irrati eta komunikabideen eremuan.

Akordioaren arabera, Euskalerria Irratiak eta Euskaltzaindiak alkarri bere ikerketa-ondareak erabilteko aukerea emongo deutse eta, bereziki, bere artxibategi, fonoteka eta bibliotekak erabilteko aukerea.

Ganera, Euskaltzaindiak erantzuna emongo deutse Euskalerria Irratiak egindako kontsultei, kontsultok euskal lexikoari, gramatikeari, onomastikeari, ortografiari eta, oro har, euskerearen araugintzearen beste zenbait gairi buruzkoak diranean.

Irratigintzearen arloan, alkarlana bultzatuko da, eta baterako programak sustatuko dira, euskerazko normalizazinoaren eta normatibizazinoaren eremuan, euskerazko zabalkunde-lanak batera egiteko eta, holan, bi sinatzaileok euskerearen inguruan sortutako corpusa zabaltzeko.

Horrezaz gan, Euskalerria Irratia eta Euskaltzaindia alkarlanean arituko dira, euren biblioteketako eta fonoteketako euskal funtsak sendotzeko; horretarako, euron argitalpen funtsetatik, zenbait lan ekarriko ditue. Bi erakundeek lankidetza politika bultzatuko dabe ikastaroak eta programak sortu eta egin daitezan, euskereari eta euskal kultureari jagokezan komunikabide eremuetako programazinoen bitartez batik bat.

Bi urteko iraupena izango dauen hitzarmen hau koordinetako, Euskalerria Irratiak eta Euskaltzaindiak Jarraipen Batzordea eratuko dabe, bakotxak bina ordezkari izango ditualarik.