Abel Enbeitaren ‘Goizero’

1- Begiak ezin ireki,
zergaitik inork baleki...!
Egunsentiaren zama
astunegia da beti.

2- Eguzkiak irriparra,
sutan da mendi bizkarra...
Ilargiak disimuluz
itxi du begi bakarra.

3- Farolen keinu jolasa,
piztu da herriko plaza...
Kale estuan sartu da
gauaren azken arnasa.

4- Pausu baldar itxusia,
eztula ta aharrausia...
Auzoko mamala horrek
gaur ere ez ikusia.

5- Txakurrak zaunka hirutan,
iratzargailua sutan...
Izarak korapiloan
ohearen beheko puntan.

6- Begira nago, begira,
ihintza tantaren diztira...
Izarren keinu azpian
Zelaia perlaz jantzi da.

7- Larrosa zuri gorriak
zabaldu ditu orriak,
erleak sartu zaizkio
Ezti gosez etorriak.

8- Zuhaitz puntatik begira,
zozoa kantuz ari da...
Poetaren hitz landuak
paperean sartu dira.

9- Printzesak odola urdin
ihintzak freskura ikurrin...
Maitasuna izozten da
Goizero zenbait ikurrin.

10- Amamak amari ekin
amak alabari berdin...
Egunsentia borrokan
Hiru belaunaldirekin.

11- Badoa gaua, badoa,
badoa gauaren loa...
Egun berriaren suak
heriotzara daroa.