MCCk eta Zeelanda Barriko enpresa batek 'joint-venture' bat eratu dabe

Mondragon Korporazio Kooperatiboak (MCC) eta Zeelanda Barriko enpresa elektriko publikoa dan Meridian Energy Limited-ek 'joint-venture' bat eratu dabe, Espainian ‘WhisperGen’ izeneko mikrosorkuntzarako sistema barritzaile bat fabriketako. Sistema hori Europako merkatuan be zabalduko da.

'Joint-venture'-ko kideak gaur egun Euskal Herrian kokatuko dan produkzino lantegiaren azken ukutuak emoten dabilz, eta lehenengo ekipamenduak 2008-2009ko neguan hornidutea espero dabe, MCC-ko iturriek jakinarazo dabenez.

Mikrosorkuntzarako ‘WhisperGen’ sistemea gasez elikatzen da, eta etxean erabilteko balio dau. Berokuntzako galdara eraginkor legez funtzionetan dau, aldi berean sare elektrikora eroaten dan elektrizidadea sortuz. Sistemea Zeelanda Barrian garatu eban Meridian Energy-ren filiala dan Whisper Tech etxeak.

Mikrosorkuntzarako ‘WhisperGen’ sistemea (mCHP) egiazko iraultza isil bihurtzen ari da energia sortzearen arloan, eta merkatu askotan berokuntza galdara tradizionalak ordezkatzera dator.

’WhisperGen’ sistemeak abantaila ugari eskaintzen deutsoz erabiltzaileari, berokuntza eta energia elektriko osogarria lortzeko soluzino hobea dalako. Izan be, energia merketu, zentral elektrikoakazko menpekotasuna gitxitu eta CO2 emisinoak murrizten dira.

MCC Euskal Herriko lehenengo enpresa-taldea eta Espainiako zazpigarrena da finantza, industria eta banaketearen arloei jagokenez, eta presentzia handia dauka ezagutzaren eremuan, batez be, hezkuntzan eta ikerkuntzan.

Meridian Energy Limited, barriz, Zeelanda Barriko energia elektrikoaren sortzaile eta banatzaile nagusia da, eta enpresearen jaubetzaren % 100 Zeelanda Barriko Gobernuarena da. Meridian Energy-k sortzen dauen elektrizidade guztia energia barriztagarrietatik dator.