Deustuko Unibersidadeko hiru irakasle saritu ditue Kanadan

Josune Saenz, Nekane Aranburu eta Olga Rivera ikertzaileek komunikazino onenaren saria jaso eben urtarrilaren 18an McMaster World Congress izeneko biltzarraren 29. edizinoan, Ontarioko Hamilton urian (Kanada). Hiru ikertzaileak Ekonomia eta Enpresa Zientzien Fakultadeko (ESTE) irakasleak dira Deustuko Unibersidadeko Donostiako campusean.

Saria Nick Bontis doktoreak emon eutsien. Kapital intelektualaren arloan oso persona garrantzitsua da mundu mailan eta, ganera, biltzarreko programa zientifikoaren zuzendaria be bada. Biltzarra, urtero, mundu osoko akademikoen eta profesionalen bilgunea da.

Lan saridunaren izenburua 'Knowledge sharing and innovation performance: A comparison between high-tech and low-tech firms' da. Lanean, ikertzaileek erakundeetan jakintza trukatzea bideratzen daben elementuek erakundearen barritzeko gaitasunean daukien eragina aztertzen da.

Lanak erakusten dau jakintzearen kudeaketea ez dala bolada kontua. Egileen ustez, kudeaketa egokiak enpresen barritzeko gaitasuna modu erabagigarrian azaltzen dau. Lana laster argitaratuko da 'Journal of Intellectual Capital' argitalpenak biltzarrari eskainiko deutson alean.