Unai Basurko 2007ko Bizkaiko Kirolari Onena izentau dabe

| Ikusi handiago | Argazki originala

Bilboko Euskalduna Jauregian 2007ko kirolaririk onenak saritu zituan atzo Bizkaiko Kirol Kazetarien Alkarteak. Botazinoaren ostean, Unai Basurko itsasgizonak honako bost kirolari honeek baino botu gehiago jaso zituan:

- Eunate Agirre (bodyboard): Europako txapelduna eta mundu mailako onenen artean zortzigarrena.

- Ianire Elorriaga (skate): Europako onena street arloan eta kontinente mailan urtean jokatzen diran bost tituluetatik lau irabazi ditu.

- Unai Elorriaga (pistako txirrindularitzea): puntuka, Europako txapelduna; Mallorcan jokatutako mundialetan, laugarrena.

- Leire Iglesias (judo), Pariseko, Pragako Vejeneko eta Lisboako txapelketak irabazi ditu eta bigarrena da Espainian.

- Julian Sanz (muturreko txirrindularitzea): Tour Ultimate txapelketearen irabazlea eta, beraz, mundu mailako txapelduna distantzia luzeetan.

Jaialdian, beste hainbat sari be emon ziran. Urdaibai Arraun Taldea, Eloisa Compostizo tenistea, sasoi bateko Kas txirrindulari-taldeko kide izandakoak eta Samuel Sanchez txirrindularia izan ziran beste saridunak.

Gogoan izan ziran, baita, Javi Martinez 19 urtetik beherako Espainiako futbol-selekzinoko kapitaina; Javi Salgado Iurbentia Bilbao Basket taldeko kapitaina; eta Jose Venancio Lopez, Europako txapelduna aretoko futbolean Espainiako selekzinoko zuzendari moduan.

Ganera, Miguel Jauregui, Valentziako Amerika Kopan Espainiar Desafioa taldeko kapitaina; Craig Sage, Mundakako Billabong Pro surf txapelketako antolatzailea; Leire Herboso, Bangkok-eko Unibersidadeko taekwondo txapelketan zilarra; eta Euskadiko kayak-surf federazinoa be aitatu ziran.