The Pub Ibiltaria sarean honezkero

| Ikusi handiago | Argazki originala

www.thepubibiltaria.com helbidean, Oskorrik urteetan zehar berreskuratu dituan abesti guztiak dagoz eskuragarri. The Pub Ibiltariaren proiektuan berreskuratu diran abesti bakotxaren eta guztien partiturak, letrak eta midi artxiboak eskuratu daitekez.

Ezaguna danez, tradizinoaren alde xarmangarrien bila Oskorrik proiektu barri bati ekin eutson bere 25. urtebetetzearen harian. Euskal Herrian zehar kantu erdi ahaztuak berreskuratu eta egungo kulturan barruratzeko modurik zuzenenaren bila Pub Ibiltaria sortu zan. Pub Ibiltaria Oskorriko partaideakaz batera edozein musiak tresna jo edo kantetan dauen jenteak osotzen dau. Ekimen honek euskal kultureagazko eta musikeagazko pasinoak alkartuz kontzertu ahaztezinak sortzea dau helburu. Errepertoriorako aukeratzen diran kantuak ez dira zailtasun handikoak izaten, tonuak be errazak bilatzen dira eta andrazkoek zein gizonezkoek kantetako moduko tesiturak aukeratzen dira.

Kontuak kontu, The Pub Ibiltaria bildumako 11. CDa oinarri hartuta, Santo Tomas egunean, abenduaren 21ean, arratsaldeko 19:30etan hasiko da kantaldia. Ohikoa danez, Pio Baroja plazako karpan batuko dira abeslari eta musikariak.

CD barriak danetariko kantuak batzen ditu, oso ezagunak eta guztiz ahaztuak, oso alaiak eta melankoniatsuak, tartean: ‘1813ko Donostiaren erreketa’, tropa ingelesek Donostia erre ebenekoa; ‘Biba Errepublika’, etorri barri dan Frantziako Errepublika euskaldun kontserbadore baten begitan; ‘Sakamantekasen berriak’, Juan Díaz Garaio, serieko bortxatxaile eta hiltzaile arabarraren atxilotze eta hiltzea... edo ‘Akerra ikusi degu’, ‘Maitatua sobera’, edo ‘Alferraren astea’ lako kantu piper-ezagunen bertsino osoago eta benetakoagoak.