Eusko Jaurlaritzeak eta telefonia enpresa nagusiek hitzarmenak sinatu ditue euskerea sustatzeko

Eusko Jaurlaritzak, Kultura Saileko Hizkuntza Politikarako Sailburuordetzearen bitartez, eta telefonia operadore nahiz fabrikatzaile nagusiek lankidetzarako bi hitzarmen marko sinatu ditue egunotan. Hitzarmenoi esker telefonia mugikorraren arloan euskerearen erabilereari ateak edegi gura jakoz.

Hitzarmenon bidez, Eroski, Euskaltel, Telefónica, Vodafone eta Yoigo operadoreek, eta Alcatel, Nokia, Samsung eta Sony Ericsson fabrikatzaileek konpromisoa hartu dabe euskerea apurka-apurka sustatzeko telefonia mugikorraren esparruan. Bi hitzarmenokaz Hizkuntza Politikarako Sailburuordetzeak Eusko Legebiltzarrak martiaren 30eko Osoko Bilkuran egindako eskaerea bete dauela adierazo dau Patxi Baztarrika Hizkuntza Politikarako sailburuordeak.

Baztarrika jn.ak gogoratu dau azken 20 urteotan 200.000 hiztun irabazi dituala euskereak Araban, Bizkaian eta Gipuzkoan, eta gaur egun biztanle guztien artean heren batek dakiela euskeraz, 25 urtetik beherako gazteen artean % 50etik gora izanik elebidunak.

Euskerea orain dala 20 urte baino gehiago eta arlo gehiagotan erabilten dala adierazo dau, baita sekula erabili bakoetan be: hezkuntzako maila guztietan, komunikabideetan, kultur sorkuntzearen adierazpen guztietan, informazinoaren eta komunikazinoaren teknologietan edo administrazinoan.

Eskuko telefonoen erabiltzaileei jagokenez, eta kontuan harturik gazteek asko erabilten dabela eta erabiliko dabela, 30 urtetik beherako gazteen % 77,30 gauza dala mugikorra euskeraz erabilteko nabarmendu dau, eta zenbat eta gazteago orduan eta hobeak dirala portzentajeak.

Dana dala, ohartarazo dau euskerea ‘eguneroko hizkuntza’ izatea lortzen ari badira be, erabilerearen erronkea irabazteko asko falta jakela oraindino, eta estrategia horretan kokatzen dirala, hain zuzen, sinatutako hitzarmenak.

Baztarrikak azaldu dauenez, baserriko hizkuntzea izan zan euskerea, gerora, ‘kostata, baina industrializazinora egokitu zan’, eta orain Informazinoaren eta Ezagutzaren Gizarte Globalizatura egokitzen asmau behar dauela.

Hitzarmen osogarri honeen argitan, sakelako telefonoa euskeraz erabili nahi dauenak euskeraz be erabilteko aukerea izango dau, izan be, Baztarrikaren eretxiz, hori da hizkuntza aniztasun aberatsa eta euskal gizartearen alkarbizitzea zaintzeko modurik eraginkorrena.

Esangura horretan, fabrikatzaileek zenbait konpromiso hartu ditue. Euskera ezarriko dabe apurka-apurka Euskadin merkaturatzen dituezan terminaletan, eta pantaila interaktiboen bidezko teknologia-produktuetan euskerea jarriko dabe menu eta aplikazinoetako hizkuntza-aukeren artean. Horrezaz gan, euskerea ezarriko dabe erabiltzaileen eskuliburuetan eta webgunetik jaso daitekezan euskarri elektronikoko gida azkarretan be.

Operadoreek be konpromiso batzuk bete beharko ditue. Alde batetik, terminalak fabriketan dituezan enpresei eskatuko jake euskerea izan daitela menuetako eta aplikazinoetako aukerako hizkuntzetariko bat. Eskaera hori oso mugatua izango da 2007ko Gabonetako eta Erregeetako kanpainetarako, zabalagoa 2008ko udako kanpainarako, eta orokorra izango da 2008ko Gabonetako eta Erregeenetako kanpainarako.

Ganera, euren komunikazinoetan, kanpainak egingo ditue bezeroek euskerearen aukerarik ez daben telefonoak barritu edo alda daiezan.

Era berean, publizidadean, banaketa-guneetan eta web-orrian argi adierazoko dabe zein terminalek daben euskera-aukerea, eta, nahi daben bezeroek enpreseagaz hartu-emonak euskeraz izateko aukerea bermatuko dabe, indarreko legeria betez.

Bestalde, Eusko Jaurlaritzeak zenbait konpromiso hartuko ditu; babes instituzionala emongo deutse hitzarmen hau sinatu daben enpresek euskerea edo euskal kulturea sustatzeko helburuagaz bultzaturiko ekintzei.

Eusko Jaurlaritzeak dobako hizkuntza-aholkularitzea eskainiko deutse hitzarmen honeen sinatzaileei euskerazko bersinoen egokitasuna eta terminologia-zuzentasuna bermatzeko, eta gizartean urtero sustatu eta jakinarazoko ditu telefonia mugikorrean euskeraz izandako barrikuntzak, batez be Gabonetako eta Erregeetako kanpainetan, operadoreen izenak publikoki jakinarazoz.

Baztarrikak amaitu dau esanez konpromiso honeen ondorio praktikoak, batez be, datorren urteko udan eta Gabonetan igarriko dirala, eta iragarri dau Miren Azkarate Kultura sailburuak hil honetan bertan, eta berak eskatuta, agerraldia egingo dauela Eusko Legebiltzarrean hitzarmenoi buruzko zehetasunak azaltzeko.