Internet Eguna, teknologia barriak goraipatzeko eguna

| Ikusi handiago | Argazki originala

Hori dala eta, teknologia barrien inguruko ekintzaz beteriko jardunaldia antolatu dau Tolosan Internet&Euskadi alkarteak. Goizeko 10:00etatik aurrera, Internet eta sareagaz lotutako hainbat tresnen erabilerea sustatzeko helburuagaz, egitarau aberasgarria antolatu dau alkarteak.

Jarduera horreen bitartez, Internet-ek eskaintzen dauen aukera zabala erakutsi gura da, arlo ludikoaz gan, informazinoa eskuratzeko, preparazinorako eta, orokorrean, personen bizi-kalidadea hobetzeko Internetek dauen garrantzia azpimarratzeko.

Bost gune honeek topauko ditue bertara hurreratzen diranek:

- Internet Eskolearen Gunea: Interneten nabigatzen ikasteko.
- Eduki eta Zerbitzuen Gunea: honako aukerak izango dira bertan: Internet bidezko erosketak, anbulatorioan ordua eskatzea (Osanet), Google Earth, zine karteldegia, Internet&Euskadi alkartea, KZgunea, on-line bankuak, Mendikoi, Konpondu.net, Vocento Taldea, Tolosako Udala, Euskadi.net eta beste hainbeste.
- Jokoen Gunea: bertan, Wii kontsolara jolastu ahal izango da (zentroen arteko lehiaketea antolatuko da), ‘Dance dance revolution’, ‘Guitar Hero’, futbol jokoak...
- Bideokonferentzia Gunea: Edurne Pasaban, Xabi Alonso eta Mikel Alonsogaz zuzeneko barriketea izateko eta Barnetegi Teknologikoko ikasleei alkarrizketa bat egiteko aukera eskainiko da.
- Euskadi Digital Gunea: Euskadi Digital programearen zuzeneko birtransmisinoa.
- Bazkaria.com: Euskadiko 2.0 negozio-bazkaria. Informazino teknologia barrien arloko ekintzaileei zuzendutako jardunaldia.

Jardunaldiaren amaierako ekitaldian, joko lehiaketetan irabazleei sariak banatuko jakez eta kanonik bako zuzeneko musikea entzun ahal izango da, ‘Creative Commons’ lizentziapean.

Tolosaz gan, beste herri batzuetan be hainbat ekimen antolatu dira Internet Eguna ospatzeko. Halanda be, gaurko egunak argi-ilunak be badaukaz, izan be, munduko herrialdeakaz konparauta, banda zabal garestiena dogu.