Ikus-entzunezko klusterren foroa izango da Eiken, Galizian

Euskadiko Ikus-entzunezkoen Klusterreko (Eiken) zuzendari Itziar Menak eta presidente Ricardo Gonzalezek Konpostelako Santiagon maiatzaren 10ean egingo dan Espainiako Ikus-entzunezkoen Klusterren I. Foroan izango dira.

Ekimena Cluster Audiovisual Galegok sustatu dau eta, gainera, Valentziako, Kataluniako, Extremadurako, Madrileko eta Aragoiko beste hainbat alkartetako arduradunak be batuko ditu. Lehenengo topaketa honen helburua Espainian dagozan Kluster eredu desbardinetan eta ekintza estrategikoko planetan sakontzea da.

Hainbat erkidegotan sortu barri diran ikus-entzunezkoen klusterrek argi erakusten dabe zelakoak diran enpresa-lankidetzarako egitura honek daukan onarpena, eraginkortasuna eta etorkizunera begirako aukerak. Euskadin orain dala ia hiru urte jarri zan abian egitura hori.

Honezkero lanean dagozan ikus-entzunezkoen klusterren esperientziek eszenatoki interesgarria eskaintzen dabe, aniztasun hori amankomunean jarteko eta alkarlana sendotzeko.

‘Honezkero martxan gagozanentzako, ideiak trukatzeko foroa izango da eta uste dogu erreferentea izango dala proiektuak baino ez diran klusterrentzako’, azaldu dau Eikeneko zuzendari Itziar Menak.