Udabarriko XXIII. Bertso Saioak: apirilaren 27tik maiatzaren 19ra

| Ikusi handiago | Argazki originala

Santutxuko Bertso Eskoleak eta Bilboko Udaleko Kultura eta Euskara Sailak alkarregaz antolatzen daben ‘Udaberriko Bertso Saioak’ jaialdiaren XXIII. edizinoa osogai barritzaile bategaz abiatuko da: hiru emakumek kabareta eta bertsolaritzea buztartuz antolatu daben umorezko ekitaldiagaz. Bariku honetan, apirilak 27, taularatuko dabe, iluntzeko 20:00etatik aurrera, Begoñako Udaltegian, Txurdinagako kiroldegiaren ondoan. Programako ganerako ekitaldiak (zapatuetan eguerdiko ordu batean Santutxuko Karmelo plazan egingo diran hiru emonaldiak) bertsolaritza munduko figurarik nabarmenetako batzuen topaleku bihurtuko dira, azken txapelketetan gailendu dan Andoni Egaña zarauztarra tarteko dalarik. Jaialdia gaur goizean aurkeztu dabe Bilbon Kultura eta Euskara Saileko zuzendariorde Iñaki Lopez de Agilerak eta Onintza Enbeitia eta Iratxe Ibarra bertsolariek.

’Emetik Bertso Kabareta’, Onintza Enbeita, Iratxe Ibarra eta Oihane Perea bertsolariek preparautako askotariko ikuskizun honetan, bertsoak, musikea eta antzerkiaren osogaiak tartekatuko ditue, kolorez eta umore lotsabako eta zirikatzaileaz osotutako emonaldia eskaintzeko asmoz.

Lehenengo ekitaldi horren ondoren, udabarriro antolatzen dan bertso jaialdi hau ohiko formatura itzuli eta azken edizinoetan egoitza nagusi izan dauen Santutxuko Karmelo Plazara aldatuko da. Gogoan hartu behar da jaialdia Santutxuko Bertso Eskoearen ekimenez sortu zala, eta Eskola bera dala oholtza gaineko bertsolariei gaia emoteaz arduratzen dana.

Maiatzaren 5ean, bertaratutakoek taula gainean ikusi ahal izango ditue aurrez aurre, BECen 2005eko abenduaren 18an jokatutako Euskal Herriko Bertsolari Txapelketa Nagusiaren azken edizinoko finalean jardundako bi finalista eta bi semifinalista: txapela lau aldiz jantzi dauen Andoni Egaña irabazlea, azken bi edizinoetan finalista geratu dan Maialen Lujanbio hernaniarra eta finalean parte hartu eben Aitor Mendiluze eta Sustrai Colina. 24 urteko lapurtar honek bi aldiz jokatu dau honezkero Txapelketa Nagusiko finala.

Hilaren 12an, Bizkaiko azken txapelketako finalera heldu ziran lau gazte bertsolariren txandea izango da: Arkaitz Estiballes, Etxahun Lekue eta Fredy eta Xabi Paya anaiak. Guztien artean, sei aldiz parte hartu dabe 30 urte bete aurretik Euskal Herriko Txapelketa Nagusian, Bizkaiko txapelketetan be ohorezko postuak lortu dituelarik.

Maiatzaren 19an, jaialdia amaitzeko antolatuko dan kartel ezin erakargarriagoan, bi gipuzkoar (Sebastian Lizaso, 1986ko Euskal Herriko Txapelketa Nagusian nagusitu zan bertsolari beteranoa, eta Jon Maia zumaiarra, zenbait finaletan jardundakoa) azalduko dira oholtza gainera, eta honeekaz batera, Durangoko bi bertsolari bizkaitar: hiru aldiz Txapelketa Nagusiko finalistea izan dan Unai Iturriaga eta Igor Elortza, Bizkaiko txapela lau aldiz irabazi dauena.

Aurreko edizinoetan, ‘Udaberriko Bertso Saioak’ esparru desbardinetan antolatu da, Areatzako kioskoan, Bidebarrietako Liburutegian, Santiago Plazan edota Deustuko San Pedro Plazan. Azken urteotan, antolatzaileak konturatu dira, eguraldiaren gora-beherak alde batera itxita, kalea dala ahozko literaturearen adierazpide honen naturazko jokalekua. Esangura horretan, Jaialdiak gora egin dau ikusle kopuruari jagokonez, igazko edizinoan ia 900 lagun erakarri zitualarik.

Bilbotarren artean euskal kulturea eta hizkuntzea sustatzeaz gainera, ‘Udaberriko Bertso Saioak’ jaialdiak euskaltzaleentzako topagunea izan nahi dau, Uriko bertso-eskoletan egiten dan lana bultzatzeko asmoz.

Programea

- Barikua, apirilak 27: Begoñako Udaltegian, Txurdinagako kiroldegiaren ondoan, 20:00etan. ’Emetik Bertso Kabareta’, Iratxe Ibarra, Onintza Enbeita eta Oihane Perea.

- Zapatua, maiatzak 5: Santutxuko Karmelo Plazan, 13:00etan. Andoni Egaña, Aitor Mendiluze, Maialen Lujanbio eta Sustrai Colina.

- Zapatua, maiatzak 12: Santutxuko Karmelo Plazan, 13:00etan. Arkaitz Estiballes, Etxahun Lekue, Fredy Paya eta Xabi Paya.

- Zapatua, maiatzak 19: Santutxuko Karmelo Plazan, 13:00etan. Igor Elortza, Jon Maia, Sebastian Lizaso eta Unai Iturriaga.