Bilbok ez dau gainditu hizkuntza-politikearen neurketea

Kontseiluak Herriko Etxeen hizkuntza-politikearen neurketea egin dau Euskal Herriko 66 udalerritan. Bilbok 0-10 tarteko neurketa honetan 2,1 puntu besterik ez dau lortu. ‘Ahalegin berezia egin behar dogu hizkuntza-politika bat eregiteko’, azaldu dau aurkezpenean Kontseiluko idazkari nagusi Xabier Mendigurenek.

Bizkaiko uriburua Kontseiluak egindako neurketearen 44. postuan dago. Aurkezpenean herriko datu orokorrak kontuan izan ditue: ezagutza % 74,7koa dala (euskaldunak % 15,5 eta ia-euskaldunak % 26,6). Alkatetzan dagoan alderdia EAJ-EA da.

Neurketa honetan Kontseiluak Bilboko hizkuntza-politikearen alde positiboak eta negatiboak azpimarratu ditu:

Alde positiboak

• Herritarren aholkularitzarako zerbitzu espezifikoetan (emakumea, kontsumitzailea, lanbakoa...) euskerazko zerbitzua bermatzeko erabagia.
• Langileriari euskerea ikasteko bitartekoak eskaintzen jakoz.
• Merkataritzan eta enpresen euskalduntzean eragiteko egitasmoa martxan dago.

• Ez dago euskerearen ordenantzarik.
• Gaztelania hutsezko jakinarazpen publikoak plazaratzen dira udalak euskerearen erabilerarako erabagia hartuta izan arren. Ez dira erabagiak beteten.
• Udalak diruz laguntzeko hedabideetan nahikoa da euskereari lekuren bat egiteagaz, udal erabagiz.

Euskal Herriko beste uriburuakaz konparauta, Bilbo Donostia eta Gasteizen atzetik agiri da: Donostia 4,22; Gasteiz 3,55; Bilbo 2,61; Iruñea 1,75; Baiona 0,002.

Ondorioak

1.- 7koa da euskera lehenesten dauen hizkuntza-politika egokia definiduten dauen puntuazinoa eta Bizkaiko udalerri bakarrak ez dau lortu. Gehien hurreratzen dana Lekeitio da 6,58 puntugaz.

2.- Udalek lortzen daben puntuazinoaren eta ezagutza-tasearen loturea estua da. Ezagutza-tasea zenbat eta altuagoa, orduan eta egokiagoa da hizkuntza-politikea. Berbarako: Lekeitiok % 96ko ezagutzea dauka eta 6,58 puntu lortu ditu, Barakaldok, barriz, % 3,4ko ezagutzea eta 1,13 puntu izan ditu.

3.- Deigarria da euskera ofiziala dan lurralde honetako udalerriak zerrendearen azken postuetan ikustea: Barakaldo 55., Santurtzi 54., Portugalete 51. eta Trapagaran 48.

4.- Ofiziala dan zonaldean azken postuak udalerri arabarrek eta bizkaitarrek beteten ditue.

5.- Zerrendearen lehen herenean handia da Gipuzkoako herrien presentzia.

6.- Bizkaiko Ibarrezkerreko udalerri handien puntuazinoa oso eskasa da eta rankinaren amaieran dagoz.

Abiapuntua

Kontseiluak udalerrien hizkuntza-politikearen neurketea egin dau aurrera egiteko abiapuntua zein dan jakiteko asmoagaz. ‘Lan horri esker badakigu nondik abiatu behar dogun, orain aurrera egiteko neurriak hartu behar doguz; horretarako hutsuneak bete behar dira danon artean’, adierazo dau Mendigurenek.