Afrika berbagai Guggenheim Museoan

Guggenheim Bilbao Museoak berbaldi zikloa eskainiko dau ‘%100 Afrika’ erakusketearen inguruan urtarrilaren 17tik zezeilaren 12ra bitartean. Nazinoartean ezagunak diran hainbat adituk aztertuko ditue Afrikako ekonomia, kulturea, politikea, osasuna eta gizartearen egoerea.

Berbaldi zikloaren helburua Afrikaren ganeko ikuspegi barria ezagutzera emotea da, historiak eta komunikabideek erakutsitako estereotipoetatik urrun.

Espainiako Mugarik Gabeko Medikuen erakundearen presidente Paula Farias, Africa Online ekimenaren sortzaile Ayisi Makatiani, Javier Reverte kazetaria, Stephen Smith historialaria, Alfredo Jaar artistea eta Nazino Batuen Erakundeko (NBE) idazkariorde nagusiaren lankide Peter Piot berbalariek nortasun berezia daukan kontinentearen inguruko ikuspegi desbardina eskainiko dabe Guggenheim Bilbao Museoan.

Paula Fariasek hasiko dau berbaldi zikloa, hilaren 17an, ‘Afrikako ikusezinak: ahaztutako gatazkak eta gaixotasunak’ berbaldiagaz. Fariasen esanetan, bere berbalditxuaren helburua ‘gure taldeek lekuan bertan ikusten daben errealidade hori gizarteari hurreratzea da’.

Bigarren berbaldia, ‘Afrikako gaur egungo artea eta Errenazimentua’, Ayisi Makatianik eskainiko dau urtarrilaren 22an. Ayisi Makatiani, Africa On-line Internet zerbitzu-emoilearen sortzailea izateaz gan, African Management Services Company (AMSCO) konpainiaren zuzendaria da. Konpainia horren helburua Afrikako enpresa txikiak bultzatzea da. Makatianik nabarmendu gura dau Afrikako arte tradizionalak interes handia daukala nazinoartean eta ‘artista bikain batzuen obra bereziei esker, azken urteotan Afrikako arteak bizitako marjinazinoari aurre egin jako’.

Stephen Smith historialariak ‘Afrika: Kontzeptu engainagarria edo baliagarria?’ gaiaz egingo dau berba urtarrilaren 30ean. Afrikako historian aditua dan idazlearen esanetan, ‘orokortasunak beti dagoz aurreretxiz beteta eta kalte handia eragin deutse Afrikaren geografiari, kultureari eta herrien aberastasun liluragarriari’.

Zezeila

‘Afrika-Europa: harreman luzea’ da zezeilaren 6an Javier Reverte kazetari eta idazleak emongo dauen berbaldiaren titulua. Kontinente afrikarra ondo ezagutzen dau Reverte bidaiariak Afrikaren eta mendebaldeko munduaren arteko hartu-emonen prozesuaz egingo dau berba eta sustraiak zeintzuk diran ulertu ahal izateko testuinguru historikoa emongo deutse entzuleei ‘lehenaldiaren Historiaren argitan, orainaldiko arazoak ulertzeko balioko deuskuna’.

Hurrengo berbaldia, zezeilaren 8an, Alfredo Jaar artista txiletarraren eskutik etorriko da ‘Egin dadila argia: Ruanda proiektua 1994-1998’ izenburupean. Ibilbide artistikoari ekin eutsonetik, Hirugarren Munduaren eta garatutako herrialdeen arteko desbardintasun ikaragarriek erakarri dabe Alfredo Jaar. Bere lanetan, argazkiak erregistro eta euskarri legez erabilten ditu krisialdi geopolitikoak eta sozialak lako gaiak lantzeko.