‘Adieraz zaitez!’, Gure Irratia eta ukberri.net euskerazko komunikabideeen aldeko jaia Getxon

| Ikusi handiago | Argazki originala

Gure Irratia eta UKBERRI.NET euskarazko komunikabideen aldeko ‘Adieraz zaitez!’ jaialdia izango da bariku honetan, abenduak 15, Itzubaltzeta Erromoko Gaztetxean. UKBERRI.NETeko kazetariek antolatutako ekimenean, Bapo Morgan, Kuenta Atras eta Libertad Condicional musika taldeek, UKTEST txalapartarien elkarteak, Algortako Bertsolari Eskolako (ALBE) hainbat kidek eta DJ Bull dj gipuzkoarrak hartuko dabe parte, Uribe Kostako komunikabide digitalaren eta Lapurdiko irratiaren aldeko diru bilketan laguntzeko.

Antolakuntzako iturriek iragarri dabenez, jaia arratsaldeko 19:00etatik aurrera izango da, eta bertan atarako dan dirua ‘irailaren amaieran hainbat ezezagunek era susmagarrian’ UKBERRI.NETeko erredakzinoan ostutako materiala ordezkatzeko eta Gure Irratiaren estudioan sute batek sortutako kalteak konpontzen laguntzeko bideratuko da. Era berean, Uribe Kostako egunkari digital euskaldunak bazkidetza kanpaina barri bat abiatu eta datorren erronkak jentaurrean azalduko ditu.

‘Adieraz zaitez!’ goiburuaren bidez antolatzaileek nabarmendu nahi izan dabe komunikabide euskaldun horreetan, ‘irakurri edo entzuteaz gan, entzuleak edo irakurleak era aktiboan jokatzen dauela. Hasteko, euskaldun legez agertzen dalako eta egunero edo aldiro jarrera hori elikatzen dauelako hain erdaldunduak diran zonaldetan. Era berean, bertsino ofizialetik aparte bilatzen dauelako informazinoa eta, azkenik, komunikabide arruntetan ez bezela, komunikabide honeetan zuzenean parte hartu leikelako, bai informazinoa bialduz, bai kritikak eginaz eta baita proiektuaren kide izanez eta komunikabidearen norabidea zuzenduz’, azaldu dabe.

Hasieran, UKBERRI.NETeko kideek komunikabide horretatik ostutako materiala ordezkatzeko antolatu eben jaialdia, baina Gure Irratiak bederatzi hilebeteko diru bilketearen ostean, abenduaren 5ean izandako sute baten ondorioz barriro be estudio barik egongo zala jakitean argi ikusi eben Gure Irratiaren proiektua bat datorrela ‘Adieraz zaitez!’ kanpainearen filosofiagaz eta hori dala eta Baionako irratira bideratuko dabe jaialdiak sortuko dauen diruaren herena.

‘Irailaren 28an Guardia Zibileko agente batzuek mehatxatu eta hurrengo egunetan gure argazki artxiboa, ordenagailua, disko gogorra eta argazki kamera era susmagarrian inkontrolau ezezagun batzuek lapurtu euskuezanetik, alkartasuna baino ez dogu jaso ia leku guztietatik’, adierazo dabe.

‘Adieraz zaitez!’ jaialdiko egitarauari jagokonez, 19:00etan bertso saioa izango da, Ilargi Zuazua (Sopela) eta Galder Bilbao ‘Txapi’ (Algorta) bertsolariakaz. Gai-jartzailea Nahikari Ayo izango da.

Ondoren, txalaparta festa izango da, Uribe Kostan Txalaparta Ekimenetarako Sustapen Taldearen (UKTEST) eskutik. UKBERRI.NETeko erronka barrien aurkezpena eta Gure Irratiari buruzko azken informazinoak jakinarazoko dira gero.

Kuenta Atras (Algorta), Libertad Condicional (Berango, Algorta eta Urduliz) eta Bapo Morgan (Erandio) musika taldeen kontzertuagaz eta DJ Bullen dj jaiagaz amaituko da barikuko jaialdia.