UEUk eta EHUk lankidetza hitzarmena sinatu dabe Inguma datu-basea garatzeko

Udako Euskal Unibersidadeak eta Euskal Herriko Unibersidadeak Inguma Euskal Komunidade Zientifikoaren datu-basean lankidetzea garatzeko bigarren hitzarmena sinatu dabe. 2002ko garagarrilean lehenengo hitzarmena sinatu eben erakunde biek eta gaur izenpetutako hitzarmen honi esker lankidetzearen bidea berretsi dabe.

Dokumentu honen bidez, sinatzaileek Euskal Komunidade Zientifikoaren Datu-Basea (Inguma) unibersitarioen curriculum-garapenerako erabilgarritasun handiko lanabesa dala adostu eta bi erakundeen arteko alkarlana luzatu dabe.

Inguma, Bizkaiko Foru Aldundiaren laguntzaz, UEUk sortu eta garatutako Euskal Komunidade Zientifikoaren datu-basea da. Bertan azken 30 urteotan unibersidade mailako zientzia eta jakintza-alor bakotxean euskeraz produzidu danari buruzko oinarrizko informazinoa eskaintzen da. Era honetan, Inguma datu-basean Euskal Komunidade Zientifikoan oinarri diran produktuak eta egileak batzen dira.

UEUko zuzendari Lore Erriondok eta EHUren Euskara errektoreorde Ludger Meesek gaur sinatu daben lankidetzearen helburu nagusia da EHUren euskerazko produkzino zientifikoaren erreferentziak Inguma datu-basean katalogetea. Izan be, EHUk euskerazko produkzino zientifiko oparoa dauen unibersidadea da eta oinarrizkoa da Inguma datu-basea erreferentzia horreekaz osotzea.

EHUren euskerazko produkzino zientifikoa bere osotasunean barruratuko da Euskal Komunidade Zientifikoaren datu-basean, hau da, idatzizko (liburuak, aldizkarietako artikuluak...) zein ahozko produkzinoa (irakasgaiak). Halan da be, aitatzekoa da lankidetzearen bitartez, Euskal Herriko Unibersidadean euskeraz garatu diran ikerketen datuak katalogau eta publikora zabalduko dirala www.inguma.org helbidean.

Liburuen kasuan, EHUk edozein formatutan argitaratutako liburuen gaineko erreferentziak sartuko dira Inguman; era berean, formatu digitalean bakarrik argitaratzen diran argitalpenen datuak be Euskal Komunitate Zientifikoko datu-basean katalogauko dira.

Inguma unibersidade mailako lan-tresna eta baliabidea da. Euskerazko produkzinoa zientifikoa batu, honen barri emon eta zabaltzea dau helburu.

EHUko Euskara erretoreorde Ludger Mees-en ustez, ‘euskerearen normalizazinoaren prozesuan behar beharrezkoa da indarrak batzea. Euskerazko jarduera eta produkzino handiena dauen euskal unibersidaderik barik, Euskal Herriko Unibersidadearen datuak sartu barik, Inguma hanka motz geldituko litzateke’.

Bestalde, Lore Erriondo UEUko zuzendariak azaldu dau UEUrentzat Inguma proiekturik garrantzitsuenetarikoa dala, eta bere helburua, euskal komunidade zientifikoa trinkotzea eta euskeraz egiten dan produkzino kulturala eta zientifikoa gizarteari hurreratzea dala. Bere eretxiz, proiektu honetan ‘ezinbestekoa da lankidetzea’ unibersidade zein goi mailako hezkuntza erakundeakaz, datuen bilketea eta osotasuna bermatzeko. ‘Horregatik, gaur sinatu dogun hitzarmena balio handikoa da bai UEUrentzat eta Ingumarentzat, izan be, Euskal Herriko Unibersidadea erreferentzia zuzena baita euskerazko produkzino zientifikoan’.