Euskaltzain urgazle barriek diplomak jaso ditue

| Ikusi handiago | Argazki originala

Atzo, garagarrilak 13, Bilbon, Euskaltzaindiaren egoitzan egindako ageriko bilkura berezian, euskaltzain urgazle barriek diplomak jaso zituen. Danetara, 35 euskaltzain urgazle barri izentau zituan Euskaltzaindiak maiatzaren 26an, Elantxoben eginiko osoko bilkuran.

Euskalgintzan persona ezagunak nahiz idazleak edo euskerearen jagoletzan nabarmenduak diranak aukeratzen ditue euskaltzain urgazle. Oraingoan, esparru desbardinetako profesionalak dira: zientzia, hizkuntzalaritza, irakaskuntza, kazetaritza, bertsolaritza, itzulpengintza, bibliotekonomia edota literatura arlokoak.

Akademiak 2003ko urtarrilaren 31n izentau zituan azken aldiz urgazle barriak. Orduan batzorde akademikoetako kideak izentau zituen, danetara 21.

Hona euskaltzain urgazle barrien zerrendea: Dorleta Alberdi, Sagrario Aleman, Ur Apalategi, Iñigo Aranbarri, Luis Alberto Aranberri ‘Amatiño’, Xabier Artola, Josu Koldo Bijueska, Mikel Bujanda, Jean Baptiste Coyos, Agnes Dufau, Andoni Egaña, Aingeru Epalza, Jose Luis Erdozia, Jose Ramon Etxebarria, Patxi Galé, Pruden Gartzia, Rikardo Gomez, Joakin Gorrotxategi, Angel Ibisate, Jacinto Iturbe, Joxemari Iturralde, Peio Jorajuria, Felipe Juaristi, Paula Kasares, Odile Kruzeta, Itziar Laka, Miren Agur Meabe, Laura Mintegi, Alfontso Mujika, Eneko Oregi, Elixabete Perez Gaztelu, Jakes Sarraillet, Bernardette Soule, Josu Zabaleta eta Juan Jose Zubiri.

Xabier Kintana idazkariak emon eutson hasierea ekitaldiari, izendapen-agiria irakurriz. Bestalde, gaurkoaren garrantzia azpimarratu eban: 'Bere 88 urteko ibilbide luzean sarritan banatu ditu Euskaltzaindiak sariak, dominak edo eta agiriak, baina inoiz ez horretarako berenberegi antolatutako ageriko bilkura berezi batean. Horregaitik, euskaltzain barriei agiriak banatzeko, gaur hemen egiten ari garan ekitaldi hau berezia izateaz gan historikoa be gertatuko da' .

Ondoren, Andres Urrutia euskaltzainburuak hitza hartu eta Akademiak, urgazle barrien aldeko apustua egiten dauela nabarmendu eban, lanerako apustua hain zuzen be: 'Konpromisoa dogu barrukook zuen parte-hartze zabala gauzatzeko. Konpromisoa hartzen dozue zuek Euskaltzaindiari laguntzeko. Euskaltzaindiak behar dau jakin eta ezagutu euskerearen jorratze lanetan ari diran hainbeste eragileren barri. Euskaltzaindiak bere ateak edegi behar deutsoz euskerearen arloan egunotan bizien eta behinen dabiltzan sektoreei. Hor zabizie zuek be, andrazko zein gizonezko, idazletzan, kazetaritzan, zientzian, teknika, administrazinoan, irakaskuntzan, ikerketan... eta bestelakoetan. Hortxe nahi zaitue Euskaltzaindiak, euskera eguneratu baten eskakizun eta preminei erantzun egokia emonez'.

Euskaltzaindiko zuzendaritzak ez eze, euskaltzain guztiek be, Akademia erakargarri bat egin nahi dabela azpimarratu dau euskaltzainburuak, 'batik bat, euskalgintzearen belaunaldi barrientzat, jakinik, hori bai, garai barriek urtenbide barriak eta desbardinak eskatzen dituela euskerearen aitzindaritza eta zabalkunderako'.

Hori dala eta, hona hemen euskaltzainen -osoen zein urgazleen- eginkizunik behinena: 'Guztion artean Akademiaren barruan osterantzeko bideak edegitea, batzordeen lana osotzeko eta gehitzeko, aldian aldiko lan eta ikerketen bidez, edota jentaurrean lan egiten dozuenon artean, bestelako erakutsiak eta agerikoen bidez. Etxekoak nahi zaituegu eta aldi berean, bitartekari eta ararteko, Euskaltzaindiak zuen bidez jaso daizan euskalgintzearen ardurak, bide beretik bereak be adierazoten dituala euskal eragileen artean.

Euskal Herriko leku eta herrialde desbardinetatik zatoze. Lanbideak ere eite diferentetakoak dozuez. Zuen inguruko euskerearen egoerea ez beti-beti erraza eta erosoa. Horren jakitun gara Akademian. Horrexegaitik, hain zuzen be, behar dogu zuen esperientzia eta eskarmentua, euskereak bere batasunean ahots, kolore, doinu eta hiztun desbardinak ditualako'.

Azkenean, diplomak banatu ziran. Luis Alberto Aranberri, Jose Ramon Etxebarria, Rikardo Gómez, Joakin Gorrotxategi, Angel Ibisate, Felipe Juaristi eta Juan Jose Zubiri ez ziran ekitaldian izan. Beste guztiek diploma bana jaso eben.

Diploma guztiak banatu ostean, izentau barri guztien izenean, Andoni Egañak bertsoa bota eban:

Zer ohorea pentsatzen gendun
honuntza gentozenean
nik bederen baita aitortzen dut
modu zintzo ozenean
nahiz ta Andresek gero lanera
bultza gaitun zuzenean
eskerrik asko neroni eta
beste denen izenean.

Bertsolaria maiz joaten da
bizkor zuritik zirira
izendapena onartu du
errazena hori, tira
Euskaltzaindia lasai jar leike
etorkizunari begira
27tik 3 edo 4
finak aterako dira.

Ekitaldia amaitzeko, Maria Zubikarai eta Alfonso Rodriguez biolontxelo eta biolin joleek, musika pieza batzuk eskaini zituen.