'The case of Basque: past, present and future' ale monografikoaren jarraipena argitaratu dabe

Soziolinguistika Klusterrak euskerearen egoera sozilinguistikoa aztergai dauen 'The case of Basque: past, present and future' ale monografikoa argitaratu dau, Eusko Jaurlaritzako Hizkuntza Politikarako Sailburuordetzeagaz eta Gipuzkoako Foru Aldundiagaz lankidetzan. International Journal of the Sociology of Language (IJSL) aldizkariak (arlo horretako argitalpen nagusia nazinoarte mailan) 2005ean kaleratutako izen bereko ale monografikoaren jarraipena da orain argitaratutakoa.

Patxi Baztarrika Hizkuntza Politikarako sailburuordeak adierazo dauenez, argitalpen honegaz, Eusko Jaurlaritzearen Hizkuntza Politikarako Sailburuordetzeak, Gipuzkoako Foru Aldundiak eta Soziolinguistika Klusterrak 'ahalegin berezia egin dabe euskerearen oraina, iragana eta geroa mundura zabaltzeko'.

Horren harira, Baztarrikak nabarmendu dau euskereak eta euskal hiztunek egin daben ibilbidea munduan zabaltzeko preparautako liburu honek ezaugarri bat dauela azpimarragarria, 'geu izatea geure barri emongo dugunok', hain zuzen. Maria-Jose Azurmendi eta Iñaki Martinez de Lunak EHUko irakasleek preparau daben argitalpen honetan, soziolinguistikearen arloko 'hainbat ikuspegitatik begiratzen jako gure hizkuntzearen bilakaereari' .

Beraz, liburuan egin dan azterketea oso zabala dala eta, aldi berean, oso era trinkoan aurkeztuta dagoela nabarmendu dau. Haren eretxiz, ezinezkoa litzateke holakorik lortu, gaur egun 'Euskal Herrian dogun profesional eta aditu talde bikainari esker izan ez balitz . Harro egon gaitekez urte gitxiren buruan euskalgintzeak profesionaltasunera eta goi mailako preparazino berezitura egin dauen saltoagaz', azpimarratu dau Baztarrikak.

Baztarrikaren esanetan, 'triunfalismorik barik', baina lekuz kanpoko 'apaltasun barik, euskerearen bilakaerea erreferentzia da munduko beste hizkuntza komunide batzuentzat'. Guk Quebecen edo Kataluniaren esperientziatik ikasi dogun moduan ikasi dabe beste batzuk gugandik' azaldu dau, egunotan aurkeztutako 'The case of Basque: past, present and future' lanak bi funtzio nagusi beteten dituala gaineratuz, hau da, barrura begira, bata, eta kanpora begira, bestea. 'Liburua osotzeko egindako ahaleginak indarrak batu eta euskerearen ibilbidearen irudia osotzen lagundu dau, hizkuntzearen bizitasuna jarriz lupapean, lehen, orain eta etorkizunera begira', azaldu dau.

Era berean, argitalpen honetan eragin faktore nagusiak aztertu dirala azaldu dau: 'aginte publikoen esku-hartzetik hasi eta herritarrek banaka eta taldeka hizkuntzeagazko daben jokabidera; bidean aldagai ekonomikoek, historikoek edo politikoek hizkuntzarengan eta hiztunengan daben eragina landuz'.

Liburu hau ingelesez kaleratu da helburu jakin bategaz: euskerearen egoerearen barri hemendik kanpo emotea; hori dala-eta, Euskal Herritik kanpoko soziolinguistika bilgune eta adituen artean zabaltzera joko da.

Argitalpen hau, Mari-Jose Azurmendi eta Iñaki Martinez de Lunak koordinauta, zortzi artikuluz osotua dator: Xabier Erizeren 'History of the Basque Language: From the Discours of its Death to its Maintenance'; Koro Urkizuren 'Basque Language Corpus Planning'; Xabier Mendiguren eta Joxe J. Iñigoren 'The Social Movement in Favour of the Normalization of the Basque Language'; Iñaki Martínez de Luna, Xabier Isasi eta Olatz Altunaren 'Use of the Basque Language, Key to Language Normalization'.

Horrezaz ganera, Jose M. Zendoiaren 'Economic Development and the Basque Language: A sign of hope'; Jone M. Hernández, Olatz Olaso eta Iñaki Martínez de Lunaren 'Theoretical, Social and Political Discourses on the Basque Language'; Mikel Zalbide, Nicholas Gardner, Xabier Erize eta Maria-Jose Azurmendiren 'The Future of Basque in RLS Perspective', eta Bojan Brezigar-en 'Language Policies of the European Union with Reference to Regional or Minority Languages' be azaltzen dira.