Humanidade eta Hezkuntza Zientzien Fakultadeak kontzertu bigaz amaituko ditu 50. urteurreneko ospakizunak

| Ikusi handiago | Argazki originala

Barikuan, garagarrilaren 10ean, amaituko dira Mondragon Unibersidadeko Humanidade eta Hezkuntza Zientzien Fakultadearen 50. urteurreneko ospakizunak. Horretarako, Belek eta Mugi Panderoak taldeak kontzertu bana eskainiko dabe, 18:30ean eta 20:00etan, hurranez hurran.

Hasteko, Beleren txandea izango da. Lide Hernandoren, Liher taldeko abeslari ohiaren, bakarkako lana da Bele eta soula, R&Ba eta pop uritarra nahasten ditu. Mugi Panderoa erromeria-taldea arduratuko da amaieraz, musika alaiagaz eta herri-jaietan ohikoa dan jai-giroagaz.

Kontzertuak doban izango dira, jenteari edegiak: bai unibersidade-komunidadeari, bai herritarrei be.

AS Fabriketik Eskoriatzara

Kontzertu horreez gan, fakultadearen campus guztietatik igaroko dan ibilbidea atondu dabe unibersidadeko langileek. Bihar —garagarrilak 9— hasiko da, Bilbao AS Fabriken; piraguaz, bizikletaz eta oinez, Arrasateko Udala auzoraino helduko dira parte-hartzaileak. Amaierea hilaren 19an izango da: parte-hartzaileek Udalatik Eskoriatzara bitarteko bidea egingo dabe, Aretxabaletako campusetik igarota.

Ibilbidea:

Garagarrilak 9

- Piraguaz: Bilbao AS Fabriketik Abusura [urterea Itsasmuseumetik, 11:00etan].
- Bizikletaz: Abusutik Apatamonasteriora [gitxi gorabehera, 12:30ean].
- Oinez: Apatamonasteriotik Udalara (Arrasate) [gitxi gorabehera, 17:00etan].

Garagarrilak 10

- Oinez: Udala auzotik (Arrasate) Aretxabaletako campusera [hasiera, 8:30ean].
- Oinez: Aretxabaletako campusetik Eskoriatzako campusera [gitxi gorabehera, 11:00etan].

50 urteko ibilbidea

Humanidade eta Hezkuntza Zientzien Fakultadeak 50. urteurrena ospatu dau ikasturte honetan, eskaintza akademikoan eta ikerketa-jardueran lantzen diran arloen araberako urte osoko programa baten bidez.