Kuadrilleagaz 'Gaupasa' egiteko konbita dakar BBK Salak

'Gaupasa' obrearen aurkezpena. Erretratua: © Gorka González. | Ikusi handiago | Argazki originala

BBK Salak gaur goizean aurkeztu dau prentsaurrekoan datorren Aste Nagusirako berariaz sortutako bere produkzino barria. Aurreko udetan ¡Agur, Otxoa feroz! (2023) obreagaz izandako upealako erantzunaren ondoren, Urte berri off. ¡Feliz 2025! (2024) eta Confeti. El regreso (2025), Bilboko Kale Nagusiko antzokiak, laugarren urtez jarraian, antzerki originalak, kalidadekoak eta Aste Nagusirako bertako artistek zehatz sortutakoak Koldo Bilbao, BBK Kultura arduradunak adierazo dauenez. Oraingo honetan, Gaupasa izenburua izango dau proposamenak, eta David Caiña bilbotar antzerkigile gazteak idatzi eta zuzendutako komedia izango da. Abuztuaren 23tik 30era tarterako iragarri dabe, eguneroko funtzinoetan 19:30ean.

Sarrerak bihar jarriko ditue salgai 25 euroan.

Oso hemengo istorioa kontau nahi dogu, kuadrilleak eta Aste Nagusia lako geurea dan zeozeri buruzkoa, baina aldi berean mundu guztiari dei egiten deutsona, urtetik urtera bizitza osoko lagunakaz batzea bezain unibersalagoa dan zeozeri buruz gabizalako, laburbatu dau Caiñak bere lanari buruz. Aiora Sedanok, Josu Angulok, Iñaki Marurik, Lucia Astigarragak, Ibai Ricak eta egilea bera dira ikuskizuneko interpreteak. Txorimalo kuadrilako kideak Bilboko jaietan urtero egiten daben alkarteratzerako prestetan dabizanean hasten da istorioa: jana, txupina, suak, kubatak eta, jakina, gaupasa, aurreratu dau taldeak.

Hortik aurrera, Txorimalotarrek Aste Nagusi horretan egiten dabenaren lekuko ez eze, jai partekatuen hamabost urtetan bizitako guztiaren lekuko izango da publikoa: maitasun eta desamodioak, gaitzespenak, eztabaida absurdoak, aldatzen diran adiskidetasunak, nostalgia, dramak, purpurina, kalimotxoa eta, azken finean, sekula hausi barik tenkatzen diran hartu-emon luzeak. Izan be, edonori jazoten jako, leitekeana dalako koadrilleak geure onetik ataratea edo geure buruari galdetzea zergaitik geratzen garen; baina, halan da be, holan egiten jarraitzen dogu, zehaztu dau Caiñak.

Holan, Gaupasa kuadrillen fenomenoa hankaz gora jarten dauen komedia izango da, alde txar guztiakaz baina baita on guztiagaz be; umore ezagun eta gertukoa, eguneroko drama ezagunakaz batera biziko dan ikuskizuna. Publikoak eszenan ikusten dauenagaz lotura berezia sentidutea da asmoa, danok baitogu Peio bat, Izaro bat edo Ibai bat gure inguruan eta danok galdetu deutsagu noiz edo noiz geure buruari zelan dan posible horrenbeste urte aurrerago gure koadrilleak batuta jarraitzea. Erantzuna, segurutik, antzezlanean emoten doguna baita: bizirik jarraitzen dogulako, gu izaten jarraitzen dogulako eta gure bizitzetan personak ditugulako, azkenean familia bihurtzen diranak.

Umorea galdu barik, obra oso dibertigarria da, momentu hunkigarriak be izango dira, Caiñaren eretxiz. Hazteari eta heltzeari buruz berba egiten dogu, zelan aldatzen garen, hartu-emonen bilakaeraz eta, zorionez, barriro be batzea ahalbidetzen deuskuezan lekuak eta datak dagozanez, Bilboko Aste Nagusiak, esaterako.

Kontuak kontu, Sala BBK-ren produkzino barri hau, oraingo honetan El Mortero konpainia bizkaitarragaz lankidetzan, BBK Gizarte Ekintzaren antzerkiak 2021ean gure aretoan estreinauko diran eta gero beren kontura hegan egin eta biran ibiliko diran tokiko talentuak sortutako proiektu eszenikoak bultzatzeko motor bihurtzea erabagi ebanetik hamargarren aldia da.

Lehenengo produkzinoa Yerma izan zan, La Dramática Errante konpainiagaz lankidetzan. Orduan 80 saio baino gehiago eskaini zituen Estatu osoan zehar, eta Max saria irabazi eben antzerki egokitzapen edo antzezteko bersino onenari (María Goiricelayak). Beste adibide aitagarri batzuk dira Madrilgo Fernán Gómez Antzokian eskaini zan Borderland ganbera operea eta Non dira haurrak? -Tartean Teatrogaz alkarlanean-, horregaz Euskadi osoko antzeztokietan ibili baitziran. Orain be, lurraldearen identidade kulturalei lotutako istorioen alde egin dogu -Gaupasa- honegaz. Gaupasa, koadrillak, txosnak eta Aste Nagusia lako errealidade geuretik ekinez, oinarrian gai eta emozino globalei buruz dabil, edonor interpeletako gai diranak, amaitu dau Bilbaok.