Euskrania, San Luis ikastetxea eta Logos Alkartea dira saridunak

| Ikusi handiago | Argazki originala

Euskrania Euskadi con Ucrania - Ukrania SOS alkartearen Actuaciones de apoyo a la inserción laboral en Ucrania lana autortu dabe errefuxiatuei eta lekualdatuei emoten deutsen laguntzeagaitik, harrereagaitik eta gizarteratzeagaitik, bai eta komunidade-loturak sortzeagaitik eta gizarteratze eraginkorra sustatzeagaitik be.

San Luis Ikastetxeko Redes de conexión lanak saria jaso dau ikasleen ikaskuntza teknikoa gizartea eraldatzeko tresna bihurtzeagaitik, baliabideen erabilera arduratsua sustatzeagaitik eta kolektibo ahulakazko konpromisoagaitik.

Logos Elkartea zientziaren dibulgaziorako alkarteko Zientziaz blai lana saritu dabe kultura zientifikoa modu barritzaile eta eraldatzailean Bilboko auzo ahulenetara eta ezagutza zientifikoa eskuratzeko zaltasun handienetara hurbiltzeagaitik.

Aurten, barrikuntzea da Robert F. Kennedy Human Rights Spain Fundazinoagaz lankidetzan, Kamanga Influencers Club-en Nacemos donde queremos ikus-entzunezko proiektua saritu dala. Proiektu horrek gazteek giza eskubideakaz, justizia sozialagaz eta Bilboko Udalaren Balioen Agirian jasotako balioakaz daben konpromisoa ikusarazo eta autortzen dau.

Eider Inuntziaga Bilboko Udaleko Euskerako, Herritarren Arreta eta Partaidetzako, 2030 Agendako eta Nazinoarteko Gaietako zinegotziak VIII. Bilbao Balioen Hiria Sariak banatu ditu Udaletxeko Arabiar aretoan. Eremu desbardinetako hiru erakundek Bilboko Balioen Agirian jasotako balioak bultzatzeko egindako lana autortzen dabe sariok: Euskrania alkarteak, San Luis Ikastetxeak eta Logos Zentroak.

Danetara, 48 proiektu aurkeztu dira aurtengo lehiaketara, Bilboko Balioen Agirian jasotako balioak sustatzen dituen eta auzo, barruti edo uri mailan gauzatutako edo gauzatzen dabizan ekimenak jenaurrean autortzea helburu dituana. Aurkeztutako 48 proposamenetatik 36 irabazi-asmorik bakoko alkarte eta erakundeek egindakoak dira, 9 ikastetxeek egindakoak eta 3 enpresek, saltokiek, ostalaritzak, alkargo profesionalek edo antzeko erakundeek egindakoak, danak Bilbokoak.

Eider Inuntziaga zinegotzia izan da ekitaldiaren buru eta azpimarratu dauenez, balioek iparrorratza eta Bilboko itsasargia izaten jarraitzea da helburua. Lehiaketa honek aukerea emoten deusku gure uriko balioak sustatzeko eta adierazle guztiek erakusten deuskue norabide onean goazela, jakina, printzipioakaz konprometitutako eta printzipioetan sendo dagozan herritarrei, bilbotarrei, esker.

Balioen Hiria Sariak

Bilbo Balioen Hiria proiektuaren barruan datoz. Parte-hartze bidezko ekimena da, Bilboko Udalak sustatua baina, hasiera-hasieratik, herritarren alkarlanagaz eregia. Bilbo, Balioen Hiriaren helburua gure uria ezagutua eta autortua izatea da, ez bakarrik bere berroneratze, lehengoratze eta eraldaketa ekonomiko eta uri-eraldaketa prozesu garrantzitsuagaitik, baita bere balioakaitik bere. Erakundeen, mueta guztietako enpresa, komunikabide, talde politiko eta herritarren arteko analisirako, alkarrizketarako, hausnarketarako eta lankidetzarako espazio bat sortzea da helburua, konpartidutako balioen esparru bat sustatzeko eta zabaltzeko urian.

2018ko martxoan Bilboko Balioen Agiria onartu eban Osoko Bilkureak eta hor datozen urteetan uria eta bilbotarren alkarbizitea egituratu behar daben 17 balioak identifikau ziran.