'Sopela, 1890-1936' liburua aurkeztu dau Koldo Somokuetok

Koldo Somokueto. | Ikusi handiago | Argazki originala

Sopelako udaletxean oraintsu izan zan Sopela (1890-1936): Errestaurazinoa, Primo de Riveraren Diktadurea eta Bigarren Errepublikea / Sopela (1890-1936): la Restauración, la Dictadura de Primo de Rivera y la Segunda República liburuaren aurkezpena.

Ekitaldian izan ziran Koldo Somokueto egile eta bazkidea; ikerketako zuzendaria, Ludger Mees EHUko katedradun eta Eusko Ikaskuntzako bazkidea; Unai del Burgo herriko jarduneko alkatea; Josune Etxaniz Eusko Ikaskuntzako ordezkaria; eta Mikel Begoña sopeloztarra.

Udalerriko Memoria Demokratikoa berreskuratu, ezagutarazo eta iraunarazoteko helburuari eutsiz, 2020an Sopelako Udalak 1890 eta 1950 arteko tokiko historiaren azterketea bultzatu eban Berrezarkuntzeari, Primo de Riveraren Diktadureari, Bigarren Errepublikeari, Gerra Zibilari eta Lehen Frankismoari buruzko aldia, hain zuzen be. Ikerketan informazino asko moltsotu danez, liburuki bitan jasoten da.

Lehenengoan, orain aurkeztekoa, Eleizatearen bilakaerea aztertzen da, 1890 eta 1936 artean, Sopelaren ia mende erdiko historia, gaur egun arte sakon aztertu ez dana: Berrezarkuntzearen aldiaren zatirik handiena (1890-1923), Primo de Riveraren Diktadurea (1923-1930) eta Bigarren Errepublikea (1931-1936). Bilakaera politikoa eta alderdiek herrian izan daben ezarpena aztertzeaz gan, beste alderdi garrantzitsu batzuk be jorratzen ditu egileak ikerketan, besteak beste, gatazka soziala, euskerearen egoerea edota Sopela udako helmuga turistiko lez finkatzeko prozesua.

Liburua, euskeraz eta gaztelaniaz, Eusko Ikaskuntza erakundeak argitaratu dau, Lankidetzan bildumako 69. zenbakian, eta doban eskuragarri dago hemen. Era berean, Sopelako Udalak ale batzuk jarriko ditu salgai udaletxean bertan, Kurtzio Kultur Etxean eta Turismo Bulegoan. Bestetik, liburua Sopelako Udal Liburutegian be erabilgarri egongo da.

Bigarren liburukia, Gerra Zibilari eta Lehen Frankismoari (1936-1950) jagokona, 2026ean zehar argitaratuko da bilduma berean. Lan hau guztia, 2024. urtean, Sopelako Udalak eta Eusko Ikaskuntza erakundeak 1890-1979 bitarteko Memoria historikoa eta demokratikoa berreskuratzeko sinatu eben lankidetza-esparruaren barruan kokatzen da. Momentu honetan, eta aurreko lanari jarraipena emonez, Koldo Somokueto historialaria 1948tik 1979ra arteko epealdia ikertzen dabil, Frankismo osoa eta Transizinoa be gogoan hartuta.