'Gaztemunduri ateak ireki' programeak familiak behar ditu Busturialdean

| Ikusi handiago | Argazki originala

Eusko Jaurlaritzearen Gaztemundu eta Batzen Kultur Alkartearen Ateak Ireki programak, Bizkaiko Foru Aldundiak lagundutakoa, alkarlanean dabiz euskal diasporeak dauen eragina zabaltzeko asmoz, Gaztemunduri Ateak Ireki izenpean. Bagilaren 27tik garagarrilaren 19ra bitartean, Argentina, Uruguai, AEB, Kanada eta Australiako euskal komunidadeetako gazteak hartuko ditu Goierrin (Gipuzkoan) eta Busturialdea-Urdaibain (Bizkaia).

Guztira 54 gaztek emon dabe izena aurtengo Bizkaiko egonaldirako, gehienak Argentina, Uruguai eta Australiakoak. Orain, harrera-familiak identifikau behar dira, Busturialdekoak eta euskaldunak izan beharko dabe-eta.

Aurton, Euskal Etxeetako Federazinoek (FEVA Argentinan, FIVU Uruguain, NABO Estadu Batuetan eta Euskal Australiar Alkartea) parte hartuko dabe. Programearen helburua da parte-hartzaileak Euskadik Diasporan dituan enbajadore konbertidutea.

Gaztemundu

Gaztemundu euskal diasporako gazteei zuzendutako programea da. Kanpoko Euskal Komunidadearentzako Zuzendaritzak (Eusko Jaurlaritzea) atonduta, Gaztemundu dauela 30 urte sortu zan, 1996an, eta, daborduko, Euskal Diasporako 800 gaztek baino gehiagok hartu dabe parte.

Programeak, batez beste, euskal etxeetako 26 gazte hartu ditu urtero. Aste biko prestakuntza jasotzen dabe eta Euskadiko gune ikonikoak bisitauko ditue. Gaztemundu ekimenare edizino bakotxa gai bati eskainia egon da: kultur kudeaketea, gastronomia, jantzea edo euskal instrumentu tradizionalak.

Ateak Ireki

Era berean, Batzen Kultur Alkarteak atondutako Ateak Ireki egitasmoa Estadu Batuetako eta Kanadako euskal jatorria daukaten diasporako gazteei zuzenduta dago.

Programea sortu zanetik, Eusko Jaurlaritzeak, Gipuzkoako Foru Aldundiak, Bizkaiko Foru Aldundiak, Goiekik, Goierriko udalek eta Nafarroako Gobernuak babestu dabe.

Ateak Ireki egitasmoak udako hiru asteko esperientzia eskaintzen dau Goierri eskualdeko familietan, Gipuzkoan. Azken hiru urteetan, Ipar Amerikako herrialde bi horreetako 102 gazte hartu ditu, euskerea eta euskal kulturearen ezagutzan sartu daitezan.