Busturialdea-Urdaibain egindako entzute-prozesuari buruzko amaierako txostena aurkeztu dabe

| Ikusi handiago | Argazki originala

Bizkaiko Foru Aldundiak eta Eusko Jaurlaritzeak bultzatutako Busturialdea-Urdaibai eskualdeko Guggenheim Bilbao Museoaren zabalkuntzeari buruzko entzuketa-prozesuan aztertutako mila herritarren narratiba baino gehiagoren ondorioak batzen dituan txostena azaldu dau Aguirre Lehendakari Centerrek Gernika-Lumon. Erakundeek konpromisoa berretsi eta esan dabe entzuketa-prozesuari esker hobeto ulertu dirala gizartearen ardurak eta itxaropenak.

Bizkaiko ahaldun nagusi Elixabete Etxanobek eta Eusko Jaurlaritzako lehenengo lehendakariorde eta Kultura eta Hizkuntza Politikako sailburu Ibone Bengoetxeak Busturialdea-Urdaibain egindako entzute aktiboko prozesuari buruzko amaierako txostenaren ondorioak aurkeztu ditue. Erakunde biek bultzatu dabe prozesu hori, Agirre Lehendakaria Center for Social and Political Studies (ALC) zentroaren gidaritzapean, jakiteko ia ze eretxi daben eskualdeko herritarrek Guggenheim Bilbao Museoa ingurune horretan handitzeko aukereari buruz.

Hamar hilebetez mila narratiba indibidual baino gehiago aztertu dira metodologia kualitatibo zorrotz baten bidez eta, horri esker, eskualdean dagozan eretxi-ereduak, adostasunak eta tensinoak identifikau ditue. Txostenera batutakoak erakusten dau eztabaideak proiektu zehatza gainditzen dauela eta kalidadeko enplegua, prestakuntzea, mobikortasuna, etxebizitzea, turismoa eta lurralde-kohesinoa lako gaietara zabaltzen dala, eta ezagutza baliotsua emoten duela azterketea aberasteko eta erabagi publikoak hartzeko lehendik dagozan plangintza-tresnen arloan. Holan, prozesuak dakarren mezu nagusia, museoa handitzeaz gan, eskualderako garapen jasangarriaren eskaera partekatua da.

Erakunde biek uste dabe prozesu hori XXI. mendean politika egiteko modu barri baten adierazpena dala, erronka konplexuei erantzuteko egokia. Prozesu horrek aukerea emon dau, batetik, hobeto ulertzeko Busturialdea-Urdaibaiko gizartearen ardurak eta itxaropenak eta, bestetik, ekintza publikorako erabilgarria dan ezagutzak sortzeko. Esangura horretan, erakundeek kontuan hartzen ditue txostenera batutako ondorioak, eta eskualdearen garapenagaz daben konpromisoa berretsi dabe. Prozesuak geruza kualitatibo bat dakar, bidea emoten baitau lehendik dagoan ibilbide-orria indartzeko eta osotzeko: Busturialdea-Urdaibaiko Eskualdeko Plan Estrategikoa.

Eusko Jaurlaritzako lehenengo lehendakariorde eta Kultura eta Hizkuntza Politikako sailburu Ibone Bengoetxeak eskerrak emon deutsee prozesuan parte hartu daben guztiei eta ondokoa gaineratu dau: entzute-prozesuari buruzko txostenak ez dau bide barririk planteetan, lehendik dagoanari hobeto jarraitzen laguntzen deusku: martxan dagoana indartzen dau, aztertu beharreko elementu barriak emoten ditu eta bat dator EPEak gobernantza kolaboratiboago baten alde egindako apustuagaz.

Bizkaiko ahaldun nagusi Elixabete Etxanobek adierazo dauenez, txostenak oso gako baliotsuak dakarz eskualde hori sustatzen jarraitzeko eta gizarte eta lurralde-kohesinoa indartzeko. Entzute-prozesuak agirian itxi dau Busturialdea askotariko eskualdea dala, begirada plural eta konplexuak dituala eta zeharkatzen daben eta erantzun sinplerik onartzen ez daben eztabaida handiak sortarazoten dituala. Gizartearen adostasun zabala dago garapen sozioekonomikoa ingurunearen babesari uko egin barik bultzatzeko beharraren inguruan eta identifikautako konpartidutako ardurak eskualdeko plan estrategikoan jorratzen dabiz dagoeneko. Txostenak hobetzeko kako barriak emongo deutsoz plan horri. Prozesuak ikasbide argiak emoten deutsee erakundeei: informazio gardenagoa eta partekatuagoa izatearen garrantzia eta lurralde eta gizarte-arrakalei erantzuteko preminea, izan bere, holakoek atxikimendurik eza, goganbeharra eta bidebakokeria-sentipena sortzen ditue, batez be zaurgarrienak sentiduten diranen artean. Holako arrakalak ixtea erantzukizun kolektiboa da, gizarte osoarena eta, Bizkaiko ahaldun nagusia nazenez, neugan hartzen dot.

Kontuak kontu, Gorka Espiauk, Itziar Morenok eta Julen Larrañagak, Agirre Lehendakaria Center for Social and Political Studies (ALC) zentroaren zuzendariak, zuzendarikideak eta proiektu-koordinatzaileak hurranez hurran, amaierako txostenaren ondorioak aurkeztu ditue eta, holan, buru emon deutse Guggenheim Bilbao Museoa eskualdean handitzeko aukereari buruz herritarrek aurkeztutako 1.002 kontakizun jaso, aztertu eta interpretetako hamaika hilabetez egindako lan sistematikoari. ALC zentroak, Columbia Unibersidadeko AC4 zentroaren laguntzeagaz, metodologia akademiko independentea aplikatu du Bizkaiko Foru Aldundiak eta Eusko Jaurlaritzak bultzatuta herritarrei entzuteko ekimen aurrendatria gauzatzeko.

Prozesuan, 1.002 kontakizun batu dira, interpretazino kolektiboko saioen bidez baieztauta eta Ekoetxea Urdaibain 2025eko abenduaren 1ean eta 2an egindako nazinoarteko mintegi bateko ekarpenakaz aberastuta. Parte-hartze bolumen horrek aukerea emoten dau jarrera esplizituetatik harago joateko eta eztabaida publikoan agertzen ez diran tensinoak, zehetasunak eta kontraesanak antzemoteko.

2025ean, eskualdeko 949 personari egin jakez alkarrizketak. Kasu batzuetan, bigarren alkarrizketak egin ziran gai jakin batzuetan sakontzeko eta, holan, pertzepzino-aldaketak aztertzeko, izan bere, Guggenheim Bilbao Museoa Fundazinoaren Patronatuak erabagi eban Urdaibaiko handitze-proiektua bertan behera ixtea. Horregaitik, 1.002 dira guztira jasotako kontakizunak, danak be grabauta, anonimizauta eta ALCren webgunean argitaratuak, amaierako txostenagaz batera. Alkarrizketa gehienak aurrez aurrekoak izan ziran, baina idatziz egindakoak, telematikoak eta entzunezkoak be jaso ziran.