2025ean 75.000 persona baino gehiagok disfrutau eben Bizkaiko ondare eta kultureaz

Bizkaie! 2026-01-02 11:08   Kulturea

Bizkaiko Batzar Nagusiak erakundeak lurraldearen kultur eta ondare eragile moduan daukan zeregina berretsiz amaitu dau 2025eko ekitaldia. Bizkaiko Batzar Nagusiak erakundeak funtsezko egitekoak, Foru gobernua kontroletako beharrak eta araudiaren onarpena buztartzen dituan arren, haren eragin soziala agirian geratu da barriro be, egoitzetara 75.080 persona joan diralako. Balantze hori eraikin historikoen babesa eta herritar guztiei zuzendutako erakusketa, berbaldi eta programa pedagogikoen eskaintza dinamikoa integretan dituan estrategiaren emoitzea da.
 
Gernikako Batzar Etxeak erakargarritasunaren erreferente nagusia izaten jarraitzen dau, urtean zehar 58.138 bisitariren arretea bereganatuz. Bolumen osotik, 35.438 persona modu atonduan sartu ziran bertara (sarreragaz); 22.650, barriz, modu librean sartu ziran. Bisiten jatorriak barrutiaren nazinoarteko proiekzinoa islatzen dau: Euskal Herritik etorritako 8.985 personez gan, Estadutik etorritako 22.065 persona erregistrau ziran, batez be Madrildik eta Kataluniatik etorritakoak. Atzerriko turisten presentzia be nabarmena izan zan, 27.088 bisitarigaz, neurri handi batean Frantziakoak (1.913), Estadu Batuetakoak (1.872), Alemaniakoak (1.314) eta Japoniakoak (850). Modu berean, Gernika goi mailako ordezkaritzei harrerea egiteko gune izan zan eta Kataluniako Parlamentuari, Herbehereetako enbajadoreari edo Mizgin Ronak idazle kurduari harrera egin eutsen-eta. Horrez gan, garrantzi sozial handiko ekitaldiak hartu zituan, besteak beste, Athletic Club taldearen Gernikako Arbolearen Enbajadore izentapena edo Europako titulua irabazi ostean Bilbao Basketi egindako harrerea.

Beste alde batetik, Bizkaiko Batzar Nagusiak erakundearen esku dagoan Enkarterrietako Museoak 13.422 persona jaso ezituan, izan be, Erdi Arotik gugana. Arte gotikoa Enkarterrin erakusketeak 10.000 bisitari baino gehiago hartu eban zarratu aurretik. Museoak Abellanedan egin dauen jarduerea ondarea berreskuratzeko asmo handiko lanarengaitik be nabarmendu zan, eskualdeko hainbat herritatik ekarritako balio handiko hamabi tailu gotikoren zaharbarritzea eta erakustea lortuz. Ikerketa lan horregaz eragin sozialeko ekimenek egin eben bat, besteak beste, emakumeen memoria historikoaren transmisinoan egindako lanarengaitik 30 emakume nagusi autortu zituen Amama Influencer proiektuaren hirugarren edizinoa, eta eraikinaren irisgarritasun unibersala bermetako igongailuak barriztetako lehenengo fasearen amaierea.

Bilboko jarduerea Hurtado de Amezagako administrazino-egoitzan zentrau zan. Egoitza horrek, bere erakusketa-aretoan, aldi baterako zortzi erakusketa hartu zituan, hainbat kolektibogaz eta EHUgaz lankidetzan. Erakusketa horreek 3.200 bisita baino gehiago izan zituen. Horreen artean, emakume konserba-egileei buruzko erakusketea, Euskadiko Eskultoreen Alkartearen erakusketea, Argizaiola argazki-sariak eta Pintura, Zeramika eta Increarteko unibersidade-masterren lanak nabarmendu ziran. Urtea ate edegien Batzarretik Batzarrera programearen beste edizino bategaz amaitu zan. Horri esker, herritarrek Bilboko, Gerediagako, Gernikako eta Abellanedako egoitzen ezagutzan sakondu ahal izan eben, eta, holan, Bizkaiko Batzar Nagusiek euren ondare historikoa zabaltzeko hartutako konpromisoa sendotu zan.

Azpimarratzekoak dira Bizkaiko Batzar Nagusiak erakundeko lau egoitzen eremutik harago doazan beste ekitaldi batzuk. 2025ean, Deiadar Mendien Egunaren XX. edizinoa egin eben Oizko tontorrean, ehundaka mendizale bertan zirala. Enkarterrietako Museoak atondutako Burdinolen Ibilbidearen edizinoak be harrera bikaina izan eban jentearen aldetik.

Ikusi argazki guztiak handiago