BilbaoArteren profesionalizazino artistikoa bultzatzea da asmoa

Bizkaie! 2025-11-25 07:40   Kulturea

Eusko Jaurlaritzako Kultura eta Hizkuntza Politika Sailak 70.000 euroko zuzeneko dirulaguntza bideratzen dau egonaldian dagozan artisten profesionalizazinoa eta hareen sorkuntza-prozesuen garapena sustatzeko.

BilbaoArteren laguntzen proiektuak 160.000 euroko aurrekontu orokorra dau, artistentzako dirulaguntzen iraupena bermatzeko, bai eta ikasketa, etxebizitza, azpiegitura eta aholkularitza profesional personalizatua eskuratzeko be.

Hitzarmenak 70.000 euroko zuzeneko dirulaguntzea aurreikusten dau Eusko Jaurlaritzaren aldetik, 2025-2026ko Artistentzako eta hareen produkzino artistikoko prozesuetarako baliabide egokien zuzkidurea" proiektua partzialki finantzietako. Ekimen horren aurrekontu globala 160.000 eurokoa da.

Bilboko Udaletxean egindako prentsaurrekoan egon dira Gonzalo Olabarria Bilboko Udaleko Kultura eta Gobernantzako zinegotzia; Ibone Bengoetxea lehenengo lehendakariorde eta Eusko Jaurlaritzako Kultura eta Hizkuntza Politikako sailburuak; Javier Riaño BilbaoArteko zuzendariak; eta Gorka Martínez BBKko zuzendari nagusiak.

Era berean, aspalditik BilbaoArtegaz loturea daben artista bik hartu dabe parte: Fermin Morenok bilbotarrak eta Juana García-Pozuelok. Biak dagoz artisten egonaldian gaur egun eta 2025-2026ko laguntzen proiektuko zuzkiduren onuradun dira. Arabere gehiago, lehenago be egonaldi-programaren parte izan dira, eta edizino horreetan lagatako obrak BilbaoArtek atondutako erakusketa kolektiboetan parte hartzeko hautatu dira.

Erakundeen babes estrategtikoa

Lortutako akordioaren helburua da artistentzako laguntza ekonomikoen iraupena bermatzea eta ikasketetarako, etxebizitzarako, azpiegitura teknikoetarako eta aholkularitza profesional personalizaturako sarbidea ziurtatzea. Baliabide-multzo horrek BilbaoArte mundu artistikoaren lehen lerroan kokatzen dau Europan eta sorkuntza garaikiderako erreferentzia-espazio lez finkatu da orain 27 urtetik hona.

Holan, Eusko Jaurlaritzeak bat egiten dau Bilboko Udalaren eta Bizkaiko Foru Aldundiaren babesagaz eta BBKren lankidetza historikoagaz, izan be, BBK azken urteotan beti ibili da sustatzen BilbaoArte Fundazinoak eskainitako beka, egonaldi eta sorkuntzarako laguntzen programak. Konpromiso instituzionala oinarrizko elementua da Bilboko, Bizkaiko eta Euskadiko kulturgintzan barrikuntza, tokiko talentua eta jasangarritasuna bultzatzeko.

Talentua sustatzeko laguntzak eta egonaldiak

Gaur egun, 12 artistak jaso ditue 2025-2026 aldirako laguntzak, hainbat modalidadetako proiektu artistikoak gauzatzeko: estudio bat lagatea Urazurrutiako instalazinoetan; Silver laguntzea, 50 urtetik gorako sortzaileei zuzendua; eta EHU"laguntzea, unibersidadeko Arte Ederretako Fakultadeko ikasleentzat bakarrik.

Laguntzetan, 14.300 euroko laguntza ekonomikoa eta Bilbon kokatutako bizileku bat sartzen dira, baita gastu arruntak be: sarbidea tailerretara eta tailerreko irakasleek aholkularitza teknikoa emotea, BilbaoArteko lantaldearen akonpainamendu profesionala, eta ikasturtean zehar atondutako prestakuntza-ikastaroetarako dobako sarbidea.

BilbaoArte

BilbaoArte Fundazinoaren helburu nagusia da komunidade artistikoari bere proiektuak gauzatzen laguntzea, azpiegitura espezializatuak, bitarteko teknikoak eta diziplina bakotxari egokitutako baliabide espezifikoak eskainiz.

Aurtengo deialdiaren helburua, aurreko edizinoetan bezela, 2025eko irailetik 2026ko abuztura bitartean hautatutako proiektuak gauzatzen laguntzea da eta, holan, erakundeek arte garaikidea sustatzeko eta sorkuntzearen sektorea profesionalizetako daben konpromisoa indartzea.