Bilboko Berreginen Museoak 'Mitoak orbitan. El Universo a la vista' erakusketea aurkeztu dau

Bizkaie! 2025-10-22 07:55   erakusketak

Bilboko Berreginen Museoak Mitoak orbitan. El Universo a la vista erakusketea aurkeztu dau. 2025eko urriaren 24tik 2026ko maiatzaren 24ra bitartean edegita egongo da proposamena. Errenazimenduko artelanen eta ikutu-baliabideen bidez, erakusketeak publikoa konbidetan dau mitologia klasikoaren eta behaketa astronomikoaren arteko loturak ezagutzen. Halanda ze, antxinako kulturek kosmosa interpretatzeko moduaren inguruan hausnartzeko aukerea emoten dau.

Guztira Museoaren bildumako hamar artelan batzen dituan erakusketearen komisarioa Itziar Martija da eta museoak produzidu dau. Artelan horreen artean nabarmenak dira Errenazimenduko erliebeen molde-lanak, Ubedako (Jaén) Salvador kapera sakratuan jatorria dabenak. Jainko-jainkosa greko-erromatarren irudiak dira eta naturako lau elementuekaz zein antxina eguzki-sisteman ikusgai egoazen zeruko gorputzekaz loturea dabe. Berariaz zaharbarritutako artelanak erakusketearen ardatz bezela aurkezten dira eta lehenengoz ikusgai egongo dira Mariaren Bihotza eleizan. Bilduma osotuko dabe Madrilgo Cerralbo Museotik ekarritako Errenazimenduko estanpa batek eta bilduma propiotik ateratako mukulu biribileko molde-lan batek: Partenoiko Ilargiaren gurdiko zaldi-buruak, mitologiaren eta izartegiaren arteko loturearen ikurra danak.

Bilboko Berreginen Museoan izan dan erakusketearen aurkezpen ekitaldian egon dira Gonzalo Olabarria, Bilboko Udaleko Kultura eta Gobernantza zinegotzia; Leixuri Arrizabalaga, Bizkaiko Foru Aldundiko Euskerea, Kulturea eta Kirol Saileko diputadua; Sorkunde Aiarza, Berreginen Museoko zuzendaria, eta Itziar Martija, erakusketearen komisarioa.

Proiektua Museoaren aldi baterako erakusketen politikaren barruan dago. Helburua da funts propioen balioa handitzea, horreen irakurketea aberastea eta instituzinoen arteko lankidetzea sustatzea.

Ibilbidea

Ibilbidearen egiturak bloke handi bi ditu:

- Naturako lau elementuak.

• Airearen, uraren, lurraren eta suaren irudi diran erliebeek hartzen dabe lehenengo espazioa. Errenazimenduko artelan-bilduma horrek antxinatasun klasikoa zuzenean oinarri hartzen dau. Elementuak Úbedako Salvador kapera sakratuko dekorazinoan txertatuta dagoz eta erreferentzia paganoak eta kristauak buztartzen dituan Errenazimenduko hilobi-monumentua osotzen dabe biztueraren idearen inguruan.

- Jainko-jainkosak eta planetak.

• Eguzki-sistemearen ikuskerak daukan oinorde greko-latindarrean sakontzen dau bigarren atalak. Hemen aurkezten dira antxina ikusgai egoazen planetekaz lotutako jainko-jainkosak (Merkurio, Venus, Marte, Saturno eta Jupiter), Olinpoa Zeus buru izanda eta aitatutako Ilargiaren gurdiko zaldi-buruagaz batera. Gainera, atal horretan ikutu-mahaia be badago. CIPCek egin dau, eredua modu irisgarri eta jostagarrian planetak eskalan ikusi ahal izateko.

Erakusketea

Mitoak orbitan. El Universo a la vista familiarentzako erakusketea bezela sortu dabe, edozein edadeko bisitarientzako edegia eta irisgarria. Erakusketearen museografia-diseinuak Errenazimenduko erliebeen klasizismoa eta irisgarritasun-proposamen barriak buztartzen ditu. Horrezaz gan, publikoak aktiboki parte-hartzeko ekintza-programea eskaintzen dau.

• Museoko Lagunak kideentzako bisita bereziak (urriak 22): Museoko lantaldearen eskutik erakusketea ezagutzeko aukera bakarra, urriaren 24an ateak edegi aurretik.
• Familientzako inaugurazinoa (urriak 24): familiek eta publiko orokorrak erakusketaz lehen egunetik disfrutetako ekitaldia.
• Unibersoaren argitan ikus-entzunezko esperientzia (zemendiak 21): soinuetan eta irudietan sartzeko aukerea, artearen, zientziaren eta kosmosaren arteko loturak ezartzea helburu.
• Artelana bere testuinguruan: Ubedako molde-lanak hitzaldia (zemendiak 27): esposizinoari itxurea emoten deusten erliebeen balio historikoan eta artistikoan sakontzeko hitzordua.
• Familientzako planetarioa (abenduak 27 eta 28): astronomiara erraz hurreratzeko dibulgazino-jarduerea.
• Hezkuntza-bisitak eta eskolak (urriaren 24tik aurrera): hezkuntza-maila guztietara moldatuta dagoz eta erakusketeak oinarri hartutako Jainko eta Planetak programearen lerro arrakastatsuaren jarraipena dira.

Erakusketeak aukera parebakoa emoten dau barriz be deskubriduteko unibersoaren ikuskeran daukagun ondare klasikoa eta, era berean, lehen aldiz ikusteko museoaren bildumako artelan zaharbarrituak. Kosmosa guztion eskura jartzen dauen mitologiaren, artearen eta zientziaren arteko zubia.

Ikusi argazki guztiak handiago