Leioako Udalak eta EHUk ikerketa proiektu bateratua landuko dabe

| Ikusi handiago | Argazki originala

Leioako Udalak eta Euskal Herriko Unibersidadeak (EHU) lankidetza-hitzarmena sinatu dabe, ariketa fisikoaren eta minbiziagaz dauen hartu-emonen esparruan ikerketa-proiektu aitzindaria garatzeko.

Akordioa Leioako alkate Iban Rodríguez Etxebarriak eta Estitxu Garai Artetxek, EHUko Bizkaiko Campuseko eta Komunikazinoko errektoreordeak, sinatu dabe. Akordioaren helburua minbizia daben personen ariketa fisikoaren preskripzinoa optimizetea da, esku-hartze seguruak, eraginkorrak eta paziente bakotxaren beharretara egokituak bermatuz.

Ariketa fisikoaren preskripzino personalizatua minbizia daben personengan: ebaluazinoa, triajea eta egokitutako programak proiektua Ana Rodriguez-Larrad irakasleak zuzentzen dau, Ageing On Ikerketa Taldekoa, Euskampus Fundazinoak sustatutako Onko-On Misioaren esparruan.

Ariketa egokitua eta segurua

Ikerketearen arabera, ebaluazino-sistemea jarriko da martxan, parte-hartzaileak osasun-egoeraren eta gaitasun fisikoen arabera sailkatu ahal izateko, ariketa-programa egokituak eta seguruak diseinetako.

Esku-hartzeek hiru hilabeteko iraupena izango dabe, astean saio bi izango ditue, eta bizimodu aktiboari eusteko gomendioekaz osotuko dira. Era berean, jarduera onkologikoan dabizien profesionalen prestakuntzea aurreikusten dau proiektuak, eta horri esker, udal-baliabideak indartu ahal izango dira eta holako programen jarraipena bermatu ahal izango da herrian.

Esparru horretan, Leioako Udalak, Jarduera Fisikoko Orientazino Zerbitzuaren (SOAF) bitartez, proiektuaren eskura jarriko ditu haren kirol-instalazinoak eta beharrezko laguntza ekimena herritarrei hurreratzeko, tokiko osasun-zentroekiko koordinazinoa indartuz.

Aurkezpenean, Leioako alkate Iban Rodriguez Etxebarriak azpimarratu dauenez, hitzarmen horrek herritarren osasunagaz eta ondoizateagaz dogun konpromisoa islatzen dau. Leioa bere bizitako etapa guztietan eta aurre egin beharreko edozein egoeratan personak jagoko dituan udalerria izatea gura dogu.

Estitxu Garai Bizkaiko Campuseko eta Komunikazinoko errektoreordeak lankidetzak unibersidaderen jardunean dauen garrantzia azpimarratu dau: personen eta komunidadearen ondoizatean eragin zuzena izango dau proiektu aitzindari horrek eta guztiz bat dator komunidadearen zaintzarekiko unibersidadeak dauen konpromisoagaz.

Rodriguez-Larrad ekimenaren zuzendariak adierazo dauenez, eragile ugariren arteko proiektu kolaboratiboa da hau (Osakidetza, Leioako Udala, Mugiment, Euskampus Fundazinoa eta EHU) eta eskerrak eman gure deutseet erakunde guztiei proiektua posible egiteagaitik. Ebaluazino-sistema aitzindari bat garatuko dogu, osasun eta jarduera fisikoko orientazino-sistemetan heda daitekeana. Ezagutza barria sortzeaz gan, jarduera onkologikoan dihardaben profesionalen prestakuntza integratuko dogu, baita jarduera fisikoko profesionalena be, programak etorkizunean jarraipena izan deian.

Proiektua daborduko martxan dago, eta parte hartu nahi dauenak Leioako osasun-etxera joan eta bertan galdetzea besterik ez dau.