Zirardamendi-Aiastian hildako gudari eta milizianoen aldeko omenaldia Elgoibarren

Bizkaie! 2025-09-22 09:28   Kulturea

Sabino Arana Fundazioak, hainbat elkarte memorialistak eta erakundeetako ordezkariek parte hartu dabe aurten be Elgoibarko Udalak urtero-urtero arontzen dauen lore-eskaintzan, Euskadiko askatasun zibil, politiko eta sozialen aldeko burrukan jardun eben gudari eta milizianoen omenez, batez be, 1936ko irailaren 25ean Zirardamendi-Aiastiako frontean (San Migel) hildako hamalau gudari eta milizianoen omenez.

Maialen Gurrutxaga Elgoibarko alkateak buru jardun dau hildako 14 gudari eta milizianoak lurperatu zituen hobi komunetara egindako bisitan. Alkateagaz batera, Ager Izagirre, Herri Administrazinoaren eta Erakunde Hartu-emnen Saileko Bizkaiko foro diputaduak; Aitor Miñambres Berangoko Burdin Hesiaren Oroimenezko Museoaren zuzendariak, Iñigo Caminok, Alfredo Etxebarria Elgoibarko alkate ohiak eta Iñaki Goiogana Sabino Arana Fundazinoko historialariak parte hartu dabe ekitaldian.

Hilobietara egindako bisitaldian, Goioganak euskal soldadu gazte hareek eginiko sakrifizioa gogoratu eta oroimen historikoa gordetearen garrantzia nabarmendu dau, joaneko jazoerak gogoratzeko ez eze, gazte hareek aldeztu zituen oinarriak eta idealak etorkizuneko eredutzat izateko be: behar-beharrezkoa dogu leku honetanburrukan ibili ziranen askatasun eta demokraziaren inguruko idealak geureganatzea eta horreek aldarrikatzea, azpimarratu dau.

Ibilbidearen amaieran, Jose Landa eta Jose Maria Otxoa de Txintxetru gudariek, Arana Goiri batailoikoek eta Zirardamendiko gudako beteranoek, 1952. urtean jarritako kurutzean lore-eskaintzea egin eben erakunde-ordezkariek.

Ondokoen omenez: Jose Txintxurreta, Paulino Beraza, Juan Zabala, Blas Larrazeleta, Ambrosio Etxebarria, Felipe Elorriaga, Sabin Atutxa, Emeterio Llavori, Eusebio Gaubeka, Juan Agirre, Imanol Etxebarria, Marcelino Gandarias, Miguel Palacio eta Felix Arbulu.

Ikusi argazki guztiak handiago