Bardintasunerako baliabideen mapa interaktiboa eta geolokalizatua, ikusgai

| Ikusi handiago | Argazki originala

Bizkaiko Foru Aldundiak GeoBizkaian sartu dau emakumeen eta gizonen bardintasunaren arloko toki-baliabideei buruzko mapen eta informazino interaktibo eta geolokalizatuaren plataforma publikoa. Bizkaiko Emakumeen eta Gizonen Bardintasunerako Lurralde-sarearen web-orrian be ikusgai egongo da mapea.

Herritarrentzat eskuragarri dagoan informazinoa hobetzeko prozesuan, Bizkaiak tresna publikoa sistematizau eta horreen eskura jarri dau, lurraldeko udalerri eta mankomunidade bakotxean bardintasunagaz lotutako zerbitzuen, teknikarien eta baliabideen egoera argiro eta egunerauta konsultetako aukerea emoten dauena.

GeoBizkaiak aukerea emoten dau informazino hori mapa interaktiboen bidez bistarateko; mapa horreek modu erraz eta geolokalizatuan erakusten dabe zer baliabide dagozen, non eta zelan atonduta. Gainera, informazinoa eskuragarri dago Bizkaiko Emakumeen eta Gizonen Bardintasunerako Lurralde-sarearen web-orrian.

Bardintasun-politikek egitura, persona eta baliabide egonkorrak behar ditue. Ez dira aukera administrazino publikoentzat, betebeharra baizik. Mapa horrek aukerea emoten deusku udalerriek eta mankomunidadeek egiten daben lanari balioa emoteko, baliabide horreek non dagozen eta oraindino be lanean non jarraitu behar dogun ikusarazoteko, azpimarratu dau Teresa Laespada Enplegua, Gizarte Kohesinoa eta Bardintasuna Sustatzeko foru diputaduak.

Ekimena Enplegua, Gizarte Kohesinoa eta Bardintasuna Sustatzeko Saileko Bardintasun Zuzendaritzak sustatu dau, GeoBizkaiagaz lankidetzan, bardintasun-arloko politika publikoen ikusgarritasuna, gardentasuna eta eraginkortasuna indartzeko.

Zer eskaintzen dau mapak?

Tresneak aukerea emoten dau identifiketako zer udalerrik dituen zerbitzu propioak, langile tekniko espezializatuak edo kanporatutako baliabideak, baita bardintasunaren eta indarkeria matxistearen arretearen arloan eskuragarri dagozen tresnak be.

Gainera, profesionalei, arduradun politikoei, erakundeei eta herritarrei informazino horretarako sarbide argia emoten deutse, plangintzea hobetzeko, gabeziak detektetako eta tokiko bardintasun-politika publikoak indarteko.

Bizkaiko Emakumeen eta Gizonen Bardintasunerako Lurralde-sarea 4/2018 Foru Arauaren 17. artikuluak arauten dau, eta Foru Aldundiaren, udalerrien eta udalaz gaindiko entidadeen arteko baterako lan-espazioa da. Haren helburua da tokiko bardintasun-politikak indartea eta koordinatea, teknikarien sarea sustatzea eta kolektibo feministekaz eta gizarte-erakundeekaz parte-hartzeko kanalak bermatzea.