Dobako autobus-zerbitzua Gorbeiara joateko

Argazkia: Bilboko Elizbarrutia. | Ikusi handiago | Argazki originala

Bizkaiko Foru Aldundiak Areatza eta Pagomakurreren arteko dobako autobus-zerbitzua eskainiko dau, aurton be, garagarrilaren 31n, San Inazioren jaieguna dala-eta. Horren helburua da Arratia eta Nerbioi eskualdeetako ohitureari jarraituz Gorbeiara hurreratuko diranei joan-etorria erraztea eta, era berean, Gorbeiako Parkearen ingurune naturalaren babesa bermatzea, Natura 2000 Sareko Kontserbazino Bereziko Eremua (KBE) da-eta.

Autobusak Areatzatik ekingo deutso ibilbideari 06:00etan eta hainbat aldiz egingo dau joan-etorriko ibilbidea egun osoan zehar, 19:00rak arte. Ordu horretan azken zerbitzuak urtengo dau Pagomakurretik. Joan-etorriak 20 minutuan behin izango dira.

Betiko lez, garagarrilaren 31n egun osoan galarazota egongo da ibilgailu pribatu bidez sartzea: bisitarientzat, lursailen jaubeentzat, abeltzainentzat, baita mendian dagozan babeslekuen erabiltzaileentzat be. Era berean, debekatuta egongo da bizikletak eta zaldiak foru-autobusak erabiliko dauen zirkuitutik ibiltea, zerbitzuaren segurtasuna eta arintasuna bermatzeko.

Gainera, Areatzako Udalagaz lankidetzan, dobako zazpi aparkaleku jarri dira, autoz bertara joango diranentzat. Aparketako guneak ondoko honeek izango dira:

• Arratiano aparkalekua.
• Guardamino aparkalekua.
• S3 aparkalekua.
• Karpo aparkalekua.
• Bolivar aparkalekua.
• Eskola aparkalekua.
• Astondoa pirotenkiaren aparkalekua.

Parke Naturalean jente asko batzeak eragin leiken ingurumen-inpaktua murrizteko, Bizkaiko Foru Aldundiak gogorarazoten dau debekatuta dagoala garagarrilaren 27, 28, 29, 30 eta 31n ingurune natural osoan kanpaldia egin eta gaua pasetea.