IX. Jazzinemak 'Köln 75' estreinauko dau

'Köln 75' filma. | Ikusi handiago | Argazki originala

Jazzinemaren bederatzigarren edizinoa eguenean, hilak 3, hasiko da Artium Museoan Köln 75 filmearen (Ido Fluck, 2025) aurrestreinaldiagaz. Alemania, Polonia eta Belgikak koproduzitua, filmak Vera Brandes dau protagonistea: musikearen historiako bakarkako kontzertu ospetsuenetako bat atondu eban 1970eko hamarkadan: Keith Jarrettek Kolonian emondakoa hain zuzen be. Berlingo Zinemaldian estreinau zan filma eta Donostian, Iruñean eta Gasteizen aurkeztuko da orain; Donostian eta Iruñean, Begona del Teso film-kritikariak egingo dau aurkezpena eta Arabako uriburuan, barriz, Alberto Ibarrondo Gasteizko Jazzaldiaren zuzendariak.

Era berean, Euskadiko Filmategiak The Conversation (Francis Ford Coppola, 1974) film klasiko modernoa berreskuratuko dau. Gene Hackman aktore hil barria da protagonistea, baita aurtongo zikloko kartelarena be.

Legacy (Manal Masri, 2025) Danimarkako CPH: DOX dokumental-jaialdian estreinau zan. Filmak bidaia proponiduten deusku 1950, 1960 eta 1970eko hamarkadetako Eskandinaviara, jazzaren gune garrantzitsu bihurtu zalako. Jazz musikearen izar eta izen ezagunen seme-alaben bidez egiten dau bidaia hori, besteak beste Dexter Gordon, Don Cherry, Sahib Shihab, Joe Harris eta Quincy Jones dira protagonistak. Donostiako aurkezpena Miguel Martín Jazzaldiko zuzendariak egingo dau.

Zikloa amaitzeko, Soundtrack to a Coup d’État (Johan Grimonprez, 2024) aurkeztuko da. Abbey Lincoln eta Max Roach musikariak 1961ean Nazino Batuen Segurtasun Batzordeko bileran Patrice Lumumba Kongoko liderraren hilketa salatzeko egin ebena espliketan da. Igaz estreinau zan Sundancen eta Donostia Zinemaldiko Zabaltegi-Tabakalera sailean programau eben dokumentala.

Film guztiak garagarrilean proiektauko dira Artium Museoan (Gasteiz), Tabakaleran (Donostia) eta Golem Yamaguchin (Iruñea). Nafarroako uriburuan sanferminen ostean hasiko da, abuztuaren 11ra arte. Azkenik, Le Sélect zinema-aretoetan (Donibane Lohitzune) zikloa osotzen daben lau filmetako hiru ikusteko aukerea izango da: Köln 75  (Ido Fluck, 2025), Soundrack to a Coup D’État  (Johan Grimonprez, 2024) eta Legacy (Manal Masri, 2025).

Sarrerak proiekzino-leku bakotxeko leihatiletan eta hemen dagoz salgai.