Durangoko Bizenta Mogel Bibliotekak María Moliner Sari Berezia jaso dau

| Ikusi handiago | Argazki originala

Durangoko Bizenta Mogel Udal Bibliotekeak 2024ko Irakurzaletasuna Sustatzeko María Moliner Sari Berezia jaso dau Panizan (Zaragoza), Kultura eta Kirol Ministerioko Liburuaren, Komikiaren eta Irakurketearen Zuzendaritza Nagusiak emonda. Saria 10.000 eurokoa da eta Durangoko liburutegiaren konpromisoa autortzen dau.

Durangoko alkate Mireia Elkoroiribek eta liburutegiko arduradun Esti Albizuk jaso dabe saria Panizan, María Moliner jaio zan udalerrian, Udalaren eta bibliotekaren izenean. Hitzaldian, liburutegiak udalerriko kultura arloan dauen funtsezko zeregina nabarmendu dabe: Durangon ez dogu biblioteka leku isil eta estatiko bezela ulertzen; biziteaz, mobimenduz, topaketaz eta ikaskuntzaz betetako espazio bezela hain zuzen be. Era berean, bibliotekako talde osoaren eta Astarloa Kulturgintzako lehendakari Paule Sanchezen lana eskertu gura dogu.

Saritutako proiektuak, Bizenta Mogel Bidaiak Biblioteka: jakintza eta esperientzien mundu oso baterako sarrera izenekoa, programazino barritzailea eskaintzen dau, bibliotekea esperientzia tematiko, parte-hartzaile eta gizatiarrez betetako gune bihurtzen dauena. Irakurketa-klub espezializatuen, tailerren, berbaldien eta adituakaz egiten diran topaketen bidez, bibliotekeak erabiltzaileak jakintzearen hainbat arlo modu sortzailean eta parte-hartzailean aztertu deiela animetan ditu.

Ganera, sariak Bizenta Mogelek euskerearen sustapenean eta normalizazinoan egindako lan eredugarria autortzen dau, modu natural eta aktiboan agertzen baita haren jarduera eta txoko guztietan. Liburutegia euskerea biziteko, partekatzeko eta ospatzeko gune bezela finkatu da, Durangoko kide izatearen zentzua eta etorkizun kulturala indartuz.

Aurton, 50.000 biztanletik beherako udalerrietako biblioteken 650 proiektu inguru aurkeztu dira sarirako eta horreetatik hamar ekimenek jaso dabe sari berezia.

Bizenta Mogelek bost María Moliner sari eskuratu ditu haren ibilbidean. Azken hau kategoria bereziko lehena izan da.

Liburutegiko zuzendaritzeak eskerrak emon deutsee arrakasta hori posible egiten daben erabiltzaile, boluntario eta laguntzaile guztiei: saria guztiona da. Zuek zarie gure bibliotekearen gidari eta gure barrutik sortzen diran jarduerak atontzen jarraitzeko inspirazinoa.

Halanda ze, Durangoko Bizenta Mogel Udal Bibliotekeak misinoa indartu dau, kulturearen, kohesino sozialaren eta euskerearen sustapenaren gune inklusibo bezela.