Museo Saria irabazi dau Euskararen Etxeak

Bizkaie! 2025-04-04 08:30   Kulturea

Europako Kontsejuko Parlamentu Batzarreko (PACE) Kultura Batzordearen eskutik.

Apirilak 7an, Euskararen Etxeak 2025eko Museo Saria jasoko dau Europako Kontsejuko Parlamentu Batzarreko (PACE) Kultura Batzordearen eskutik.

Iurdana Acasuso Euskararen Etxeko zuzendariak hartuko dau saria, Elixabete Etxanobe Bizkaiko Ahaldun Nagusia eta Euskerea, Kulturea eta Kiroleko dipudadu Leixuri Arrizabalaga lagun dituala, Europako Konsejuaren Estrasburgoko egoitzean egingo dan ekitaldian.

Atontzaileek nabarmendu dabenez, Euskararen Etxea museo txikia da, hizkuntza bat babesteko erronkea erakusten dauena. Euskeraz entzun, irakurri eta abestu leikete. Erakusketa lau hizkuntzatan dago (euskerea, gaztelania, ingelesa eta frantsesa) eta horri esker bisitariek aukerea dabe Europako hizkuntza horreek alkarrekaz dituen antzekotasunak eta eraginak arakatzeko.

Konstantinos Efstathiou (Zipre, SOC) Museo Sariaren Batzordeko ordezkariaren arabera: Euskararen Etxea oinarriko ekimena da, belaunarteko jarduerak dituana euskerearen transmisinoa eta erabilerea sustatzeko. Museo txiki handia da eta hiru langile baino ez ditu, jarduera asko eta bazkide-sarea kudeatzen dituenak.

1977tik, Europako Kontsejuaren Museo Saria urtero emoten jako museo bati era aitagarrian laguntzeagaitik Europako kultur ondarea ulertzen.

Aurreko edizinoetako rabazleen artean ondoko museo honeek dagoz: Białystok-eko Sybir Oroipen Museoa (Polonia, 2024), Kopenhageko Langileen Museoa (Danimarka, 2023) eta Cork-eko Nano Nagle Place (Irlanda, 2022).

Kulturea, zientzia eta hezkuntza

Hilaren 7an, Bizkaiko Ahaldun Nagusi Elixabete Etxanobek berbea hartuko dau, Kulturea, Zientzia eta Hezkuntza Batzordean, estadu kideetako ordezkariekaz batera. Museoek Europako gizartearen demokratizazinoan daben zereginari buruz berbatuko dira.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu