Vito Acconci / Sergio Prego: 'YOU' erakusketea Bilbon

Ezkerretik eskumara: Manuel Cirauqui, Miren Arzallus eta Sergio Prego. | Ikusi handiago | Argazki originala

Miren Arzallusek Guggenheim Bilbao Museoko zuzendari kargua hartu dauenetik egindako lehen agerraldi publikoan, Sergio Prego, Manuel Cirauqui eta Miren Arzallusek berak emon zituen zehaztasu guztiak baina Miren Arzallusek azpimarratu ebanez, oraindino goizegi da karguaren eta egin beharko dituan guztien gainean berba egiteko, egongo dala aukerea horretarako eta gai guztien gainean, entzun eta erabagiak hartzeko prest nago.

Kontuak kontu, Vito Acconci eta Sergio Pregoren YOU obrea aurkeztu dabe, erakusketa berezia Film & Video aretoaren programazinoaren barruan dago eta belaunaldi eta jatorri ezbardinetako artista biren performance berezia batzen dau. Artista horreen ibilbide artistikoek New Yorken egin eben bat 1996 eta 2002 bitartean, eta beren praktikek kidetasun handiak erakusten ditue.

Sergio Prego.

Aurtengo Film & Video programazinoari hasierea emoten deutson erakusketa honen abiaburua Vito Acconci (New York, 1940–2017) eta Sergio Prego (Donostia, 1969) artisten arteko lankidetzea eta adiskidetasuna da, izan be, bien arteko hartu-emonak 1996tik 2002ra bitartean izan ziran, diseinu eta arkitektura espekulatiboko Acconci Studio etxearentzat oinarrizkoa izandako garaian.

Erakusketeak ibilbide subjektiboa dakar Acconcik bideo eta performance arloan egindako lanean zehar eta Pregok diseinautako eszenografia darabil ha erakusteko. Euskal artisteak eskulturaz dauen ikuspegi berezian nabarmen antzemoten da iparramerikar artistearen ikuskerearen oihartzuna. Esangura horretan, Pregoren bideo-moltsoa be badago erakusketan, Vito Acconciren eta Acconci Studioren produkzino historikoagaz alkarrizketa argian. Acconcik eta Pregok arreta berezia eskaintzen deutsee gorputzak eta zentzumenek ikus-entzunezko baliabideakaz eta arkitektureagaz daben alkarreraginetik sortutako fenomeno estetikoei, izan be, emoten dau gorpuztasuna kamereak jasotako ingurune fisikoaren arau eta egituretara egokitzen saiatzen dala beren lanetan. Artista bientzat, ikuslearen kontzientzia fisikoan eragin zuzena daben tensino eta kontraesan horreen adierazpen zehatzak dira artelanak.

Erakusketako komisarioa Manuel Cirauqui da eta Guggenheim Museoko Film & Video aretoa (103).