Edegita Durango Sariak 2025eko Sari Berezia hautatzeko epea

| Ikusi handiago | Argazki originala

Durangoko herritarrek 2025eko Durango Sari Berezia irabazlea aukera leikete. Durango Sariak ekimenaren barruan dago eta kulturea, kirol, gizarte, euskerea edo bardintasun arloetan nabarmendu dan persona edo entidade bati autortzea eginez emongo da. Bozketa epea apirilaren 10era arte dago edegita eta herritar guztiek parte hartu ahal izango dabe hemen.

Durango Sariak persona eta alkarteek Durangoren aurrerapenari egindako ekarpenak balioan jartzea dau helburu. Sariak maiatzaren 8an San Agustin Kulturgunean egingo dan galan emongo dira.

Martiaren 4tik 24ra edozein persona edo entidadek hautagaitzak aurkezteko aukerea izan dabe. Guztira, 25 proposamen jaso dira.

Durango Sari Berezia 2025

Herritarrek ondoko hautagaiak ditue:

• Maristak Ikastetxea: 120 urte eskualdeko hezkuntza, gizarte eta ekonomiaren garapenari eskainita, Maristak Ikastetxeak funtsezko papela dau gazteen prestakuntzean. Enplegagarritasuna, barrikuntzea eta nazinoarteko proiekzinoa bultzatuz, Durango erreferente bihurtu da hezkuntzean. Haren urteurrenean, komunidadeagaz dauen konpromisoa berretsi dau.
• Asun Lopez (Urrike Liburu-denda): 45 urteko ibilbideagaz, Urrike Liburu-denda, herriko merkataritzearen zutabe izan da. Tokiko merkataritzeari eta kultureari egindako ekarpenek Durangoko ekonomia eta nortasuna indartu ditue. Halanda ze, erreferente bihurtu da hainbat belaunaldirentzat.
• Elixabete Sanchez: El mundo de Nadia eleberriaren bidez, Elixabete Sanchezek autismoaren espektroko nahasmendua (TEA) ikusgai egin dau, itxaropen eta ulermen mezua eskainiz. Ganera, salmentetatik lortutako irabaziak Apnabi Alkarteari emon deutso.
• Alain Salterain: DOT komunikabidearen zuzendaria, Alainek kazetaritza konprometidua sustatu dau Durangon. Haren lanaren bidez, informazino sare lokalaren indartzea eta eskualdeko kulturea, gizarte eta kirol arloetako gaiak ikusgai egitea lortu dau. DOT informazinoaren erreferente bihurtu da.