Enkarterrietako Museoak hile honetan zarratuko dau arte gotikoari buruzko erakusketea

Turtziozeko erretaulea. | Ikusi handiago | Argazki originala

Sopuertan, Abellanedan kokatutako Enkarterrietako Museoak, Enkarterriko eskualdearen ondare gotiko aberatsa ezagutzera emoteko asmo handiko proiektua zarratuko dau apirilean; igazko bagilean inaugurau zan Erdi Arotik gugana. Arte gotikoa Enkarterrin aldi baterako erakusketearen barruan, Enkarterrietako Museoak jentearentzako leihoa zabaldu dau, hiru mendez Bizkaiko eszena sortzailean nagusi izandako estilo artistiko hori ezagutzera emoteko. Erakusketeagaz batera, Enkarterrietako Museoak arte hori ezagutzeko ibilbide kulturalak atondu ditu, azken biak datozan apirilaren 13an eta 27an, domekaz, izango dira, Romañako San Pedro (Turtzioz) eta San Nikolas (Pobeña) eleizen aztarna gotikoak ezagutzera emoteko. Emon izena museoaren webgunean edo 94 650 44 88 telefono-zenbakiaren bidez.

Bizkaiko Batzar Nagusiak erakunearen jaubetzakoa dan kultur zentroak ondare balio handiko 38 pieza batzen ditu aitatutako arte gotikoaren erakusketearen inguruan. Urregintzako piezak, irudi eskultorikoak eta margolanak batzen ditu; bildumea Jesus Muñiz Petralanda historialariak XIII. eta XVI. mendeen artean Bizkaiko ondarean errastu garrantzitsua baina ezezaguna itxi dauenak.

Proiektu horren emoitzea Enkarterriko kultuzko tenpluak hartzen dituan arte gotikoari buruzko argitalpena izan da eta ikasturte kultural honetan gauzatzen dabizen jarduera ugarik osotzen dabe. Erakusketea 17 jarduera paralelo atontzeko biztugarri izan da, besteak beste, arte gotikoak Enkarterrin itxi dauen errastua ezagutzeko berbaldiak, zaharbarritze tailerrak edo bisita gidatuak. Azkenengo bisita gidau biak Enkarterrietako Museoan hasiko dira, autobusez, eta Aste Santu aurretik eta ostean programau dira.

Bisita gidatuak

- Apirilaren 13an

Romañako San Pedro eleizearen (Turtzioz) jatorri gotiko berantiarra. Gotiko garaiko kapitel zizelkatuak dituan eleiza horretara bisitea Jesus Muñiz Petralanda historialariaren azalpenakaz.

- Apirilaren 27an

Pobeñako San Nikolas eleizako Andra Mari gotikoa. Bisitea Muskizko auzo horretan dagoan eleiza txikira. Bertatik dator ezagutzen dogun Andra Mari gotikorik txikiena. Jarduerea El Pobaleko burdinolagaz (Muskiz) lankidetzan egingo da. Bisitaldia, erakusketeak hiru tailu gotiko zaharbarritu dituan Rocío Fernández Amezuak museoan emongo dauen berbaldiagaz hasiko da.