II. Lai Koloreak
2025-04-02 09:54 KultureaKultura ezbardinak integretea da helburua.

Lea Artibai Ikastetxeak Lai Koloreak ekimenaren bigarren edizinoa egingo dau apirilaren 19an [11:00 – 13:30], Ikastetxeko zelaietan eta, oro har, eskualdean dagoan kultura-aniztasuna ezagutzera emoteko.
Igazko erantzun bikaiaren ondoren, aurten be hitzordua jarri dabe geugaz bizi diran kultura ezbardinetako herritarrakaz bat egiteko, alkar ezagutzeko eta eskualdearen kultura-aniztasuna suspertzeko. Holan, hainbat stand jarriko dira bigarren eskuko gauzak trukatzeko, besteak beste, erropak, liburuak, olgetak eta bestelakoak. Herrialde ezbardinetako jatekoak probetako aukerea egongo da eta artisauak be egongo dira euren lanak erakusten. Musikea, janari, jantza, olgeta eta beste jarduera batzuen bidez kultura ezbardinen inguruan ikasteko aukera aparta izango da. Ekitaldia goizeko 11:00etan hasi da eta 13:30ean amaituko da. Ez da salmentarik egingo, hau da, standetan jarritako produktuak trukatu edo hartu ahal izango dira, pagau barik.
Lea Artibai Ikastetxeak eskualdeko herritar guztiak animetan ditu apirilaren 19an Lai Koloreak ekimenaren bigarren edizino honekin bat egin eta kultura-aniztasunean sartu daitezan.
Lanerako Prestakuntza Lea Artibai Ikastetxean
Markina-Xemeinen kokatutako Lea Artibai Ikastetxea erreferentea da goi-mailako hezkuntzearen arloan, bai eskualdean, bai eskualdetik kanpo be. Urtez urte, bere zerbitzuak sendotzeko eta hobetzeko lanean dabil, izan be, Batxilergoko eta Lanbide Heziketako eskaintzaz gan, Lea Artibai Ikastetxeak Lanerako Prestakuntzara bideratutako eskaintza zabala dakar:
• Lanerako Prestakuntzako 13.000 ordu, Lanbidek diruz lagunduta.
• Herrialde ezbardinetako 1.200 ikasle.
• Lanbakoentzako 44 ikastaro.
• 75 ikastaro lanean dagozanentzat.
Horrezaz gan, Lea Artibai Ikastetxeak orientazino eta laneratze-zerbitzuak eskaintzen ditu, bai eta bitartekaritza-zerbitzua be, eskualdeko edota irregulartasun-egoeran dagozan atzerritarrentzat.
Erantzun
Erantzuteko, izena emanda egon behar duzu. Sartu komunitatera!