Basauri eta Bilbo lotuko dituan bidegorria inaugurau dabe

| Ikusi handiago | Argazki originala

Lurraldean mobikortasun jasangarria sustatzea da foru-gobernuaren konpromiso nagusietako bat, baita bizikleten erabilerea sustatzea be, herritarrentzako ohiko garraiobidea izan daiten. Bizkaiko Foru Aldundia, Azpiegituretarako eta Lurralde Garapenerako Sailaren bitartez, Bizkaiko Bizikleta Bideen Plan Sektoriala lantzen dabil, izan be, helburua da lurralde osoa lotzeko bidegorri-sarea egitea.

Kontuak kontu, Bizkaiko Ahaldun Nagusi Elixabete Etxanobek bizikleta-pistea inaugurau dau Boluetan, hau da, Basauri, Etxebarri eta Bilbo lotuko dituan bizikleta-pistea, txirrindularientzako eta oinezkoentzako 1,09 kilometroko azpiegiturea. Inaugurazino-ekitaldian udalerrietako alkateak be izan dira, Asier Iragorri, Iker López eta Juan Mari Aburto.

2023-2035eko Bizikleta Bideen Lurralde Plan Sektorialak bizikleta bideen arloko beste arau bat taiutu dau eta, besteak beste, edukien artean, Bizkaiko bizikleta-azpiegituren eskari-analisiak dagoz. Basauri-Boluetako tarte inaugurau barriari jagokonez, azterlana agertoki bitan oinarritu da joan-etorrien aurreikuspenak egiteko. Lehenengoa, epe ertainekoa, 2029an jarten dau, eta ordurako aurreikusi dau egunean gehienez 2.100 txirrindulari eta oinezkoen okupazinoa izango dala lanegunetan. Bigarren agertokia 2035aren mugan jarri dau eta, ordurako, egun-tarte berean, 6.400 joan-etorri dagoz aurreikusita.

Basauri-Boluetako bidegorria

Basauri-Boluetako bidegorria oinarrizko proiektua da Bizkaiko Foru Aldundiaren mobikortasun jasangarriaren estrategian. Bidearen hasierea Basauriko udalerrian dago, Larrazabal kaleko Kaleroko aparkaleku publikorako sarreran, eta amaierea Boluetako zubian.

Datorren udan hasiko dira zubibidea edegiteko lanak, Nerbioiko bizikleta-pistara (1. lineara) behar dan tartean egokitzeko. Era berean, Etxebarrigaz bizikletaz eta oinez konektetea ahalbidetuko da, izan be, laster Etxebarriko Udalak bidezidorra egingo dau Boketeko tunelaren inguruan bizikleta-pisteagaz lotzeko.

Basauri eta Bolueta arteko ibilbideak 1,09 kilometroko luzerea dauka; 4 metro zabal, bizikletetarako, eta 2 metrokoa, barriz, oinezkoentzat. Bizikleta-pistea Kaleroko aparkalekuan hasi eta Bilbo-Durango-Arratia tranbia zaharraren plataformara egokituko da; paraje naturalean, Ibaizabal ibaiaren eta trenbidearen arteko mendi-hegalaren erdialdetik doa.

Boketeko tunelaren hegoaldeko sarrerea berreregi da, hondatuta egoalako eta barrualdeko segurtasuna indartzeko. Horregaz batera, Etxebarrik eskatuta, segurtasuna arabere gehiago indartu da, izan be, tunelaren zenbait lekutan, Udalak kudeatuko dauen bideozaintza-sistemea eta argi gehiago jarri dira.

Proiektuaren barruan, Kaleroko aparkalekua birmoldatzea be baegoan. Beraz, kotxeak aparketako 48 plaza egokitzeaz gan, 100 metro koadro inguruko atsedenlekua, zurezko jarlekuak, mahaiak eta bizikletak aparketako tokiak jarri dira.

Aurrekontua 3,5 miloe eurokoa izan da eta Europako EGEFek eta foru-funtsek finantziau dabe.