'Hitzaurrea' proiektuaren estreinaldia Loraldia Festibalean
2025-02-20 11:07 AntzerkiaEtorkizunera bidaia soinu-esperientzia digitalean.

Hitzaurrea proiektuaren emoitzea 2025eko Loraldia Festibalaren 11. edizinoan aurkeztuko da lehenengoz. Proiektu hau 2023ko Loraldia Sormen Digitala Bekearen onuraduna izan zan eta urte bateko lanketearen ondoren esperientzia barritzailea dator orain: Piszifaktoria Ideien Laborategiak eta Fikzio Fabrikak sortua (Irati Agirreazkuenaga, Xabier Landabidea, Eneko Olazabal eta Mikel Ayllón), martiaren 10ean, Azkuna Zentroko Atriotik abiatuta, entzuleek teknologia eta sorkuntzea buztartzen dituen esperientzia parebakoa biziteko aukerea izango dabe.
Hitzaurrea proiektua Loraldia Sormen Digitala Bekearen bigarren edizioaren irabazlea izan zen, 2023an. Deialdi honen helburu nagusiak euskerazko sorkuntza digitala sustatzea eta ingurune digitalean euskerazko eduki gehiago sortzeko aukerea emotea dira. 2023ko udagoieneko deialdian 19 proposamen aurkeztu ziran, eta horreen artean aukeratua izan zan.
10.000 euroko ordainsariagaz, taldeak teknologia eta sorkuntzea buztartzen dituen soinu-fikzinoa landu dau, entzule bakotxak erabagi propioen bidez kontakizun bakarra sortzeko. Proiektuak teknologia modu ergitzailean erabiltea dau helburu, gizakia baldintzatu beharrean, haren ahalmenak areagotzeko. Errealidade analogiko eta digitalaren arteko nahasketak aztertzen dira, etorkizun bat izateko oraina ulertu behar dala premisatzat hartuta.
Soinua izango da istorioaren euskarri nagusia eta entzuleek aukera biren artean hautatu beharko dabe atal bakotxaren amaieran. Holan, bidaiaren norabidea entzulearen erabagien araberakoa izango da, ohiko kale eta lekuak ikuspegi barri bategaz biziteko aukerea eskainiz. Etorkizuna gaur da. Ondo etorri orainaldira. Ondo etorri etorkizunaren hitzaurrera.
Ekitaldiaren xehetasunak
● Data: martiak 10, astelehena.
● Ordua: 19:30
● Lekua: Azkuna Zentroa – Alondegian atrioan izango da hitzordua
● Iraupena: 60 minutu.
● Sarrera: Doban.
● Sarrerak agortuta dagoz.
Erantzun
Erantzuteko, izena emanda egon behar duzu. Sartu komunitatera!