San Frantzisko Herri Ikastetxea 'Tik Tak Tok' astean dabil

| Ikusi handiago | Argazki originala

Astelehenean hasi eta zapatura arte, Bermeoko San Frantzisko Herri Ikastetxea Tik Tak Tok astean dabil. Lehen Hezkuntzako 3 eta 6. maila bitarteko ikasleei zuzendutako jarduerea da. Ikasleez gan, gurasoak eta irakasleak be parte-hartzen dabe. Ekimenaren helburua da danon artean ikaskuntza komunidadea sortzea eta pantailen erabilera egokia sustatzea.

Tik Tak Tok astea San Frantzisko Herri Ikastetxea, Familia Alkartea eta Bermeoko Udalaren alkarlanari esker sortutako ekimena da. Programa pilotua da Herri Ikastetxeagaz batera prestautakoa, ikastetxearen eskaera bati erantzuna emonez. Besteak beste, ondoko gai honeek landuko ditue aste honetan: sare sozialak, bideojokoak eta erabilera onaren dekalogoa.

Bermeoko Udalaren Gazteria saileko arduradunek adierazo dabenez, San Frantzisko Herri Ikastetxea Bermeoko Udalaren Adikzinoak Prebenitzeko Zerbitzuagaz eta kale hezitzaileagaz hartu-emonetan jarri zan, zeozer barritzailea egin gura ebala esanez, ikasleak, familiak eta irakasleak inplikauta.

Ikasleek landutako gaiak, ordubeteko tailerretan jorratzen ditue. Guztira, 7 tailer dira LH 3 eta 4. mailetan, eta 6 tailer, LH 5 eta 6. mailetan. Azken bi honeetan, irakasleek eta gura daben gurasoek parte-hartuz. Aste guztiko tailerrei amaierea emoteko, zapatuan, 11:30etik 13:30era, ginkana bat egingo dabe, astean zehar landutako guztia bateratzeko.

Bermeoko kale hezitzailea eta Adikzinoen Prebentziorako teknikariak arduretan dabiz proiektua gidatzeaz. Egitasmoa, Bermeoko Adikzinoen Prebentzinorako Tokiko Planaren barruan dago.

Programea amaitzen danean, balorazinoa egingo da. Emoitza ona izan ezkero, jarraipena emoteko asmoa dagoala iragarri dabe Gazteria sailekoek.