Silver Film Festival' zinemaldiak Silver Saria emongo deutso Helena Taberna zinemagileari

Helena Taberna | Ikusi handiago | Argazki originala

EITBren babesari esker emondako sariak emakume baten ibilbidea eta espiritua autortzen ditu, izan be, emakume horren lanak kontetan diran gizarte-izakerako istorioak ikusarazoteko etenik bako bilaketea islatzen dau, batez be terrorismoagaz, memoria historikoagaz, errefuxiatuen egoereagaz edo emakumeen eskubideakaz lotutakoak.

Produktore, zuzendari eta gidoilari egindako lanak nabarmen lagundu dau zinema-industrian beste emakume batzuentzat bidea edegiten eta adibide ona da esateko edadea ez dala aurrera egiteko trabea.

Horregaitik, Silver Film Festival (S/FF) martiaren 24tik 28ra egingo da Bilbon, eta astelehenean, hilak 24, emongo jako saria, aurten Bilboko Arriaga Antzokian egingo dan Inagurazino Galan.

Nafarroako zuzendariak presentzia bikotxa izango dau jaialdian: Silver Saria jasoteaz gan, Nosotros proiektu barria aurkeztuko dau martiaren 27an Golem Alhondiga zinema-aretoetan, publikoagaz barriketan ibili ondoren. Aitatu filma zezeilaren 28an estreinauko da eta Isaac Rosaren Final feliz eleberrian oinarritutako maitasun istorio bat berreregiten dau.

Silver Film Festival (S/FF)

Zinema eta pentsamendu jaialdia da eta aurten gizarteak edade guztietarako izan behar dirala zehaztu dabe atontzaileek. Horregaitik, belaunaldien arteko hartu-emonen alde egiten dau hirugarren edizino honetan eta edaderik ez dauen gizarte bat zelakoa izan daitekeen irudikatzeko konbita egiten deusku.

Tu & Yo Producciones, Fundación EDE eta Silver Revolution Elkarte Kulturala alkarteek atondutako jaialdiak Bilboko Udalaren, Eusko Jaurlaritzaren, BBK Fundazinoaren, Bizkaiko Foru Aldundiaren eta Zineskadiren babesari esker egiten da.