Euskadiko Orkestreak Robert Trevinoren ibilbideari amaierea emotea erabagi dau

Robert Treviño (Euskadiko Orkestrea). | Ikusi handiago | Argazki originala

Euskadiko Orkestrearen Administrazino Kontseiluak, urtarrilaren 27an egindako bileran, Robert Treviño Euskadiko Orkestrearen zuzendari artistikoaren titulartasunari amaierea emotea onartu dau. Holan, maisuak zortzi urteko zikloa amaituko dau Euskadiko Orkestrako buru lez. Berton egindako lana bizia eta emonkorra izan da, mugarri garrantzitsuakaz, esaterako: nazinoarteko birak (Polonian, Parisko Theatre Camps Elyseesen edo Salzburgoko kontzertuak), grabazino diskografikoak Finlandiako Ondine etxeagaz edo pandemian musika-jarduerea barreskuratzea, estadu-mailan martxan jarritako lehen orkestrea bihurtuz.

Erabagia, norabide-aldaketako prozesu baten parte da. Ziklo artistiko bat zarratzen dau eta barri bati ateak edegiten deutsoz, Euskadiko Orkestrearen proiektuari.

Bestalde, Oriol Rochek orkestrearen zuzendaritza nagusia be itxiko dau hurrengo hilebeteetan. Roch izan da Euskadiko Orkestrako zuzendari nagusia hamar urte eta erdiz eta, holan, taldearen buru denpora gehien emondako zuzendari nagusia izan da.

Proiektuari egindako ekarpena nabarmentzen da eraldaketa digitalagaitik eta lan-sistema barriak ezartzeagaitik, baita EiTBgaz aliantza garrantzitsua egiteagaitik be, orkestrearen jarduerea kanpora zabaltzeko, ingurune digitalean ikusgarritasuna irabazita, nazinoartean posizionamendu estrategikoa lortzearen alde.

Barrikuntza biakaz, Euskadiko Orkestreak beste aro bati ekingo deutso, haren garapen artistikoa sustatuz eta talde sinfonikoaren osperi eutsiz. Halanda ze, kontzertuetan abonautako persona gehien dituan Euskadiko erakunde kulturala izaten jarraitzen dau.

Administrazino Kontseiluak eskerrak emon deutsee zuzendari biei azken urteetan Euskadiko Orkestrearen zerbitzura egindako lanagaitik.

Bestalde, orain dala egun gitxi, Juanjo Menak alzheimerra daukala adierazo dau. Mena maisua, orkestrearen kolaboratzailea izan da askotan. Sare sozialetan Euskadiko Orkestreak ondokoa aitatu dau: zenbat eta ze proiektu on partekatu doguzan zugaz Mena Maisua. Barrienak udagoien honetan, Denporaldiko kontzertuetan, eta lehenago, zuk esaten dozun bezela, lagunartean disko-grabazino garrantzitsuan. Alkarregaz jarraituko dogu musika ona egiten!