Emilia Perezek lau sari irabazi ditu Urrezko Globoak sarietan

Bizkaie! 2025-01-07 08:13   Zinemea

Emilia Perez lau sarigaz eta The Brutalist, hirugaz, izan dira 82. Urrezko Globoetan irabazle nagusiak.

Emilia Perez Jacques Audiardek zuzendutako pelikula frantsesak Hollywoodeko Prentsa Atzerritarraren Alkarteak urtero emoten dituan sarietako lau bereganatu ditu, baina hamar hautagaitza zituan.

Nikki Glaser umoregileak Los Angelesko Beverly Hilton hotelean zuzendutako galan, Audiarden thriller musikalak eroan ditu pelikula musikal onenaren saria, abesti original onenarena, ingelesezkoa ez dan pelikula onenarena eta bigarren mailako emakumezko aktore onenarena (Zoe Saldana). Karla Sofia Gascon aktore espainiarra, pelikulan protagonista, aktore onenaren saria jasoteko hautagaien artean egoan, baina azkenean Demi Moorek eskuratu dau The Substancen egindako lanagaitik.

Edozelan be Emilia Perezen lantalde osoagaz batera eszenatokira igon eta gorrotoaren kontrako berbak egin ditu: Eskerrik asko. Kolore honeek aukeratu ditut gaur, budismoaren koloreak, mezu bat dodalako zuentzat: argia beti nagusitzen jako iluntasunari. Hainbeste gauza ditut orain esateko... Karzelara bialdu eta joko nozue baina sekula ez dozue gure arimea, gure erresistentzia eta gure nortasuna zuenganatuko. Esan ozen: askatasuna. Nazena naz, ez zuk nahi dozuna, adierazo du aktore espainiarrak.

Beste alde batetik, The Brutalist pelikula dramatiko onena izentau dabe, zuzendari onenaren saria emon deutse Brady Corbeti eta gizonezko aktore onenarena Adrien Brodyri.

Fernanda Torresek irabazi dau emakumezko aktore dramatiko onenaren saria, Ainda estou aqui pelikula brasildarrean egindako lanagaitik eta Sebastian Stanentzat izan da komedia edo musikaleko gizonezko aktore onenaren saria. Kieran Culkinek bigarren mailako aktore onenaren urrezko globoa irabazi dau A Real Painen egindako lanagaitik.

Ganerako sariak

Gints Zilbalodis letoniarraren Flow katuen pelikula txikia izan da sariduna animazino sailean.

Gidoi onena Peter Straughanentzat izan da Conclavegatik.

Trent Reznorrek eta Atticus Rossek soinu-banda onenaren saria eroan dabe Challengersen egindako lanagatik.

Wickedentzat izan da txartel-leihatiletako lorpen handienaren Urrezko Globo barria, besteak beste, Deadpool and Wolverine, Alien: Romulus, Twisters, Gladiator II, The Wild Robot, Beetlejuice Beetlejuice eta Inside Out bi jasota.

Telebista arloan, Shogun izan da irabazle nagusia. Feudalismo garaiko Japonian girotutako drama historikoa hautagai zan lau kategorietan irabazi du: telesail dramatiko onena, emakumezko aktore protagonista onena (Anna Sawai), gizonezko aktore protagonista onena (Hiroyuki Sanada) eta bigarren mailako gizonezko aktore onena (Tadanobu Asano).

Hacks izan da nagusi komediazko telesailen atalean eta Jean Smart protagonisteak beste urrezko globo bat eroan dau.

Jeremy Allen Whitek be barriro eskuratu dau saria The Bear telesailean egindako lanagaitik.

Baby Reindeer lanak telesail labur onenaren saria eskuratu dau. eta Jessica Gunning protagonistarentzat izan da bigarren mailako emakumezko aktore onenaren golardoa.

Animazino pelikula onenaren globoa Flow letoniarrak eskuratu dau.

Jodie Foster be saritu dabe True Detectiven egindako lanagaitik eta Colin Farrell The Penguinengaitik.

Ali Wong aktoreak eskuratu dau lehenengo aldiz emon daben stand up umoregile onenaren saria.