Basque Team Fundazinoaren Gabonetako Galea gaur, hilak 23, izango da Bilbon

| Ikusi handiago | Argazki originala

Basque Team Fundazinoak Urrezko Bikain saria jaso dau, euskerearen kalidade ziurtagiria, hizkuntza horren erabileran maila gorena autortzen dauena. Saria emoteko ekitaldia, Ibone Bengoetxea lehen lehendakariorde eta Kultura eta Hizkuntza Politikako sailburua buru zala egin da eta beragaz batera Sonia Rodriguez, Hizkuntza Ikerketa eta Koordinazinorako zuzendaria be egon da.

Aurtengo ekitaldiaren goiburua Hitzaren uhina, hizkuntzaren oihartzuna izan da. Basque Teamen aldetik, Maria Perez Cordoba, fundazinoko administrazino arduradunak jaso dau saria.

Bikain Eusko Jaurlaritzeak emoten dauen ziurtagiri ofiziala, publikoa eta dobakoa da. Esparru sozioekonomikoan euskerearen presentziaren, erabilerearen eta kudeaketearen normalizazino-mailea egiaztatu eta autortzen dau. Izen ofiziala hauxe da: Bikain – Euskerearen Kalidade-ziurtagiria. Hizkuntza Politikarako Sailburuordetzeak kudeatzen dauen autortza-sistema integral baten katebegia da.

Bien bitartean, Pariseko Jokoetako gorabeherak errepasau, ziklo olinpiko barriari ondoetorria emoteko eta azken urtean goi maileari agur esan deutsen atletak omentzeko asmoz Basque Team Fundazinoaren Gabonetako Galea gaur, hilak 23, izango da Bilbon, EITBren egoitzan (Multibox) arratsaldeko 19:00retan. Hurreratuko diranen artean Bajartxo Tejeria Legebiltzarreko presidentea, Ibone Bengoetxea lehen lehendakariorde eta Eusko Jaurlaritzako Kultura eta Hizkuntza Politikako sailburua, Gorka Iturriaga Eusko Jaurlaritzako Jarduera Fisikoaren eta Kirolaren zuzendaria, Andoni Aldekoa EiTBko zuzendaria eta Olatz Legarza Basque Teameko koordinatzailea izango dira, Basque Teameko kirolariakaz batera.