Gatibuk kontzertua berezia emongo dau Gernikan

| Ikusi handiago | Argazki originala

25 urteko ibilbidearen ondoren, taldeak agur esango dau 2025ean. Testuinguru berezi horretan kokatzen da Haziberri eta Gatiburen arteko alkarlanaren bidez sortutako Azken Zoramena Gernikan kontzertua.

Zoramena izan dira beti Gatibuk Gernikan urteetan zehar eskainitako kontzertuak, izan be, Zoramena izena jarri eutsen euren lehenengo diskoari. Orain, Gernikan eskainiko daben azken kontzertua izanik, dimensino berezia hartuko dau. Holan, taldearen sustraiei eta hasierei keinua egingo deutsen errepertorio berezia prestetan dabiz.

Lehen hiru diskoei keinua

Kontzertuaren lehenengo zatian, taldearen lehen hiru diskoak izango dira ardatz: Zoramena, Disko Infernu eta Laino guztien gainetik, sasi guztien azpitik. Disko horreek Gatiburen alderik rockeroena erakusten dabe. Kantu horreez gan, taldearen abesti arrakastatsuak edo hitak be ez dira faltako. Kontzertu errepikatuezina izango da. Ganera, kolaborazino bereziak be aurreikusten dira.

Upealako erronkak, neurriko espazioa

Gernikan Gatiburi egingo jakon agurrak neurri bereko espazioa behar dau. Kontzertua egiteko Astrako parkinga leku egokia da: publikoak zuzenekoa eroso ikusteko aukerea emoten dau eta Gernikatik kanpo datorren jentearentzat be kokapen aproposa da, tren eta autobus geltokiak gertu dagozalako.

Jaialdia arratsaldean hasiko da

Gatiburen kontzertua gauean izango dan arren, arratsaldean zehar beste musika talde batzuk be ibiliko dira. Taldeen izenak laster jakinarazoko ditue eta kontzertuez gan, bestelako jarduerak eta edari-janari eskaintzea be izango dira. Jaialdiaren kartel osoa martian iragarriko dabe.

Sarrerak salgai

Sarrerak salgai jarriko dira internet bidez, gaur, hilak 19, eguerdiko 12:00etatik aurrera, hemen. Sarrera fisiko mugatuak eskuratu ahal izango dira abenduaren 23an, astelehenean, Gernikako Turismo Bulegoan, 12:00etatik aurrera.