Argazkineta ekimenak batutako materiala partekatuko dau

Bizkaie! 2024-12-09 10:03 erakusketak

Altamira, Masustegi eta Mintegitxueta auzoetan.

Bilboko Udalak, Bilbao Izan udal-programearen barruan, Argazkineta ekimenak batutako materialen zati bat partekatuko dau Altamira, Masustegi eta Mintegitxuetako bizilagunekaz. Ekitaldia abenduaren 17an izango da, martitzenena, Argazkineta Showen eta Altamirako Hirutasun Santuaren eleizan 19:00retatik aurrera. Sartzea doban izango da lekua bete arte.

Argazkineta, auzotarrek parte hartzeko ekimena da, auzoen historia berreregitea eta sakontzea helburu dauena, uriko auzoetako bizilagunek emon leikien dokumentazinoa eta lekukotasunak batuz.

Urriaren erdialdetik zemendiaren hasierara arte, proiektuaren seigarren edizinoa jarri zan martxan, Altamira, Masustegi eta Mintegitxueta ardatz hartuta. Furgonetea Bilboko goiko auzo horreetara mobiduten zan, bertoko bizilagunak konbidaduteko euren akorduak eta bizipenak alkarbanatu eta Bilboko txoko horreen historia eta nortasuna hobeto ezagutzen laguntzeko.

Erantzuna oso positiboa izan da, udal proiektu horretan parte-hartze handiena izan dauen edizinoa izan baita eta berton batutako materiala askotarikoa eta ugaria izan da, izan be, 250 bisita jaso ditu ibilgailuak, 58k digitalizau beharreko materiala emon dabe eta 34k alkarrizketak egin ditue testigantzak eta akorduak partekatzeko.

Batutako akorduen artean 2.656 artxibo digitalizau dira, batez be, argazkiak (2.547); baita dokumentuak (40), bideoak (37), diapositibak (26) eta negatiboak (6) be. Horreek guztiak digitalizau egin dira eta dagoeneko Bilboko udal artxiboen parte dira.

Argazkineta Show

Datorren martitzenean, hilak 17, Altamirako Hirutasun Santuaren Eleizan Argazkineta Showen herritarrek ekarritako material horren aukeraketea partekatzeko unea izango da. Irudiak eta personak izango dira Ugaitz Alegria aktoreak aurkeztutako ekitaldiaren protagonistak. Topaketa dibertigarria, parte-hartzailea eta atsegina izango da. Halanda ze, urrian eta zemendian ibilgailura hurreratu ziran guztiek helarazotako argazkiak, bideoak, akorduak eta bizipenak proiektauko dira.

Argazkineta Show elebiduna izango da. Ganera, topaketea grabau egingo dabe eta zezeilean eskuragarri egongo da Bilbao Kulturaren YouTube kanalean.